Ginadan lider kan LFS ika-77 victima
Na-aalarma
na an militanteng grupo sa Bicol kan nangyayaring sunod-sunod na
pang-lilikidar kan saindang mga miembros sagcod mayo man
nareresolveran kan awtoridad an mga caso na nagsakat na sa 77 an
mga victima.
An pinakahuring victima si Cris Hugo, 20 anyos magraduar na sa
cursong journalism sa Bicol University an binadil kan calibre
.45ng badil kan duwang armadong lalaki kan Domingong alas 10:30
banggi (Marzo 19) sa Bagumbayan Washington Drive, Ciudad nin
Legazpi.
Si Hugo, regional coordinator kan League of Filipino Student,
miembros kan national executive council asin activong lider kan
militanteng grupo sa Bicol.
Sinabi ni Erick Torrecampo, Secretary General kan Bagong Alyansang
Makabayan (BAYAN) sa Camarines Sur na na-aalarma na sinda kan mga
panglilikidar sa saindang mga pag-iriba huli ta an suspechados kan
saindang mga pag-iriba sa Albayposibleng mga miembros kan military
death squad.
Kabali pa sa angulo iyo an iriwal sa fraternity.
Kabali sa mga dai palang nahahaloy na pigbaradil gadan sa mga
magkasuhay na incidente iyo sinda Abner Dala, municipal
coordinator kan Anakpawis sa Capalonga, Camarines Norte, Max
Frivaldo, provincial coordinator kan Bayan Muna sa Irosin,
Sorsogon, Jesus Lombo, miembro kan Anakpawis sa Ragay, Camarines
Sur asin si Ricardo Uy, City Coordinator kan Bayan Muna sa Ciudad
nin Sorsogon.
Sinda kabali na sa listahan na dai natatawan nin justicia an caso
mientras na an saindang suspechado miembros kan military. Alagad
sa lado kan Philippine Army sa saindang kasimbagan puros
pagpahimotik sa caso mientras na mayo man nagkaka-igwa nin
solucion sa mga investigacion kan PNP.
Bako lang digdi sa kabikolan an halaba na an listahan kan mga
victima envez sa iba pang mga region na parejo man an caso lista
sana sa mga jepatura de policia.
An militanteng grupo bestadong contra administracion huli kan mga
isyu orog na sa mga curapcion, pagprotehir kan mga dayuhan na
Americano, pagtuyaw sa mga pang-aabuso kan nasa gobierno asin
militar.
Dawa na ngai siring an mga mamundong incidente an grupo
magpapadagos pa sa pakikipag-laban, sabi pa ni Torrecampo.
