PGMA, "mapapogi" sa consumedores-Lagasca
SAN
FERNANDO, Camarines Sur - “Pampa-pogi ni GMA kun saiyang idadagos
an pagpahuros nin tarifa sa corriente, alagad afectado an
operacion kan cooperativa nin corriente nahulog na ngani sa
category D asin E an kadakli sa mga cooperativa sa kabikolan”. Ini
an reaccion ni Board President Eugenio Lagasca, Jr. kan Casureco
II sa mga pahayag sa prensa ni Congresista Joey Salceda kan tercer
distrito kan Albay na si Presidente Gloria Macapagal-Arroyo ano
man na aldaw ma-anunciar kan pagpababa kan singil sa tarifa sa
corriente.
Igwa ngani sinda nin peticion sa Energy Regulatory Commission (ERC)
para sa dagdag na singil sa tarifa huli ta padagos na nalulugi
asin an solucion langkawan an tarifa tanganing makahawas sa
pagruro kan kamugtakan financial.
Haralangkaw na an cantidad kan materiales sa electricidad, mga
kagamitan sa oficina, sueldo kan mga empleados kaya mas lalong
madificilan na an manijamiento mientras na sa ngonian ngani
kadakli kan mga cooperativa nin corriente an planong mag-peticion
sa ERC para sa dagdag na tarifa.
Alagad kun an pagpahuros kan tarifa hahalion na an 12 por cientong
EVAT o kun dai man an mga pig-iimponer na babayadan sa power bill
kan National Transmition Corporation (Transco) dai sinda ma-oponer,
sabi pa ni Lagasca.
Si Salceda an nagsayuma magdetalye kun perang centavos an ibabawas
sa tarifa sa corriente huli ta si Presidente Arroyo an ma-anunciar
habo niyang enotan an presidente.
Kun paghali na kan 12 por cientong EVAT iyan saindang papavoran
huli ta dakulang tabang sa mga miembros consumedores na nakakamati
na kan halangkaw na electric bill cada bulan matapos magsingil nin
dagdag na buis an gobierno.
Mientras tanto, ipapadagos kan Casureco I an paglaog sa Investment
Management Contrat (IMC) asin pigtalaan na sa Abril 21, 2006 an
pagpasubasta kan manijamiento sa interesadong mga darakulang
investor nganing maglaog na sa IMC huli ta bulan-bulan nalulugi an
saindang operacion dawa na maglangkaw pa an collection efficiency.
