Salceda pabor ibalik sa Naga, CSur an GRC
SI
House Appropriation Chairman Joey S. Salceda kan tercer distrito
kan Albay nagpabor na an gabos na mga oficina regional kan mga
agencias de gobierno ibalyo sa Ciudad nin Naga, Camarines Sur
halion an Government Regional Center (GRC) sa Rawis, Ciudad nin
Legaspi nganing makaibitar sa ano man na pagtuga kan Volcan Mayon
na na-aafectaran an dalagan kan transaccion kan mga oficina
regional kun nasa halangkaw na alert level an volcan.
Ini an mga pahayag ni Salceda sa ginibong press conference sa
University of Nueva Caceres matapos kan saiyang pagtaram bilang
juespe de honor sa ika-58ng graduation ceremony sa Colegio kan
Marzo 19, 2006.
Kasimbagan man ini sa inaprovaran na resolucion kan Sanggunian
Panlalawigan kan Albay na naghuhurot ki DA Secretary Domingo
Panganiban na ibalyo an mga oficina regional kan Department of
Agriculture (DA) asin Bureau of Fisheries and Aquatic Resources (BFAR)
hali sa Pili, Camarines Sur pasiring sa Government Regional Center
sa Rawis, Ciudad nin Legaspi.
Hinapot sa press conference an congresista kan tercer distrito kan
Albay na tibaad siya pa an maghiro nganing an natatada pang mga
oficina regional sa Camarines Sur ibalyo sa Ciudad nin Legaspi
envez an saiyang panindugan contra na halion digdi an iba pang mga
oficina regional sagcod na pigpaboran niya na kaipuhan darahon sa
Ciudad nin Naga asin Camarines Sur huli ta libre sa calamidad sa
pagtuga kan Volcan Mayon.
An mga natatada na sanang oficina regional digdi sa Naga asin
Camarines Sur iyo an National Irrigation Administration, DA, BFAR,
asin NBI.
Sa Sanggunian Panlungsod kan Ciudad nin Naga, si bise alcalde
Gabriel H. Bordado, Jr. an nagpahayag nin pasasalamat ki Salceda
asin nagsugo na sa secretary kan sanggunian na maghaman nin surat
nganing ipaabot an dakulang pasasalamat kan mga oficiales local
kan City Hall.
An City Hall nagpasar nin resolucion kan Pebrero 13, 2006 na
nagcocontra sa resolucion kan SP Albay naghuhurot ibalyo sa Ciudad
nin Legaspi an mga oficina regional kan DA asin BFAR.
Kan Pebrero 14, 2006 sa Sanggunian Panlalawigan kan Camarines Sur
nagkasararo na magpasar nin resolucion contra sa kahurotan kan LGU
Albay.
An kahagadan kan Albay sa pagbalyo kan DA asin BFAR sa Ciudad nin
Legazpi huli kan Presidential Proclamation No. 1676 petsado
Octubre 8, 1977, na pigdeclara ni dipuntong dictador Presidente
Ferdinand Marcos an sinambit na ciudad bilang regional center kan
Bicol.
Mientras tanto, an PHIVOLCS an nagpahayag na daing peligro an
Regional Center sa Rawis, Ciudad nin Legaspi oras na magtuga an
Volcan Mayon huli ta luwas naman ini sa 6 kilometer dangerous
zone. An regional Center may distancia nin 12 kilometros.
Dawa hinali kan PHIVOLCS an peligro sa Regional Center, alagad an
ibang mga agencia dai man giraray nahahali an kahaditan kun
nagtutuga an Volcan.
