SP may resolucion na ibalik an
regional center sa Naga
AN
resolucion kan Sanggunian Panlungsod kan Ciudad nin Naga na
naghuhurot sa pagbalyo kan gabos na mga regional office kan mga
agencias de gobierno hali sa Bicol Regional Center sa Ciudad nin
Legaspi na madara digdi asin Camarines Sur, Ciudad nin Naga an
pueding buhayon giraray.
Pitong taon na an nakaka-agi pigpasar an sinambit na resolucion na
pigpadrenohan ni Consejal Esteban Abonal sa tahaw kan kainiti
kaidto kan pagtuga kan Volcan Mayon sa Ciudad nin Legaspi huli ta
prakasado na an transaccion sa mga oficina regional huli kan
pagbuga nin aso hali sa volcan.
Ini magiging kasimbagan sa mga pahayag sa prensa ni House
Appropriation Chairman Joey S. Salceda na pabor siya na ibalyo
digdi sa Naga asin Camarines Sur kan Bicol Regional Center salbado
pa sa mga pagtuga kan volcan.
Sinabi ni Abonal na an saiyang resolucion suportado kan gabos na
miembros kan Sanggunian Panlungsod mientras na an Camarines Sur
harani sa mga provincias kan Camarines Norte, Masbate na na-agi na
sana sa Pasacao, Camarines Sur, Catanduanes naduong na sana an
viaje sa dagat sa Sabang, Partido.
Ginigibo sa Ciudad nin Naga an taonan na regional fiesta ki
Nuestra Señora de Peñafrancia asin mas dakula an populacion kun
icocomparar sa provincia kan Albay. Kaya may dahilan na ibalik na
digdi an regional center.
Nahakot an mga oficina regional kan gobierno hali sa Camarines Sur
asin Ciudad nin Naga kan poderoso pa kaidto sa politica sinda
dating Senador Dominador Aytona asin Victor Ziga. Dai naulang kan
mga taga Ciudad nin Naga asin Camarines Sur huli ta ginamit ninda
an poder mientras na mayo kaidto nin miembros kan senado hali
digdi sa provincia.
