---

TUROG NA, PADABA KO
Estelito A. Jacob

Pano baga makakaturog
Ining pobreng aki kan banwaan
kun naglakma na an duyan - -
raot, basa, mabata!

Pano baga makakaturog?
Makamandag na namok ining lulay
na nagkakagat sa mga laman,
hinihilo pati mga kalag,
luway-luway na ginagadan
an bulabog nang kaginhawahan.

Gatok pa ngani an kagat
kan lumang osipon.

Hararom pa an banggi
alagad mata na an gabos sa pagkataranta.
Garo baga kaya ining mga aki kan banwaan
mga omboy sanang nag-uuka,
dai maaraman an pagmate,
dai maaraman an pangangaipuhan.

Pano baga makakaturog
sa panayuknok mong
“Turog na, padaba ko”?
Dios ko! Pano?