---

2 empleado pigreclamo nin panunutok

IRIGA CITY - Nakatalaan na sangsangan nin caso criminal sa corte kan sarong pedicab driver an sarong oficial de barangay na nangulog asin nanutok saiya nin badil pagkatapos kan sarong mainit na discusion.

Susog sa reclamo ni Joselito Romas, 43 anyos asin residente kan Sitio Tarusan, San Francisco kan ciudad na ini, kan nakalihis na Marso 17, mientras na siya papulion na sa saindang harong siya pigconfrontar kan sarong kagawad kan barangay San Roque na pigbisto sa pangaran na Glen Gonzales.

Si Gonzales soboot anggot saiya sa rason na pigbulgar niya na may pighaharong siya GRO sa sarong boarding house na ikina-anggot kan saindang landlady. An landlady pinalayas an kagawad asin an saiyang nene huli kan imoral nindang relacion asin kan darang kadimalasan kaini sa harong.

Minsan ngani nagpahayag kan saiyang lado na bako man siya an nagbuyagyag kan sikreto kan nag-alburutong kagawad, mag-agom na sampaling an tuminugpa sa mag-ibong na pisngi ni Romas sabay tutok nin dai na nadeterminaran na kalibre nin badil sa saiyang tagiliran na haros ikadismayo kan viktima huli kan labi-labing katakutan.

Sa intrevista kan Bicol Mail, sinabi ni Romas na sasangsangon niya nin asunto si Gonzales na bistado niyang may pagkabarumbado asin may kabit talagang GRO na pigbisto kaining si Shasha.

Sa saro pang insidente nin panunutok, pigreclamo man kan sarong Andres Marcaida, 52 anyos kan brgy. San Miguel si Lorenzo Turiano Jr. na iyo an nagtutok saiya nin badil kan nakalihis na Marso 12, alagad nagkaigua sana nin kusog na magsumbong sa polis kan Marso 26.

Susog sa reklamo ni Marcaida sa Iriga PNP, fuersahan siyang pinalayas ni Turiano sa pigtitindahan niyang puesto sa laog na nin haros 30ng taon nin huli ta ini soboot sakop na kan puesto kan ina ni Turiano.

Si Turiano empleado kan City Assessor’s Office nagserbing market superintendent kan nakalihis na mga panahon, nagnegar kan acusacion contra saiya ni Marcaida, pasubang sinabi ni Turiano na mayong katotohanan an sahot kan complainant nin huli ta dai siyang sadiring badil, afuera sana saiyang totoong badil na bihira ng magputok ngonian kun kaya takot siyan maki iwal sa sisay man. (Romeo Olea)