3 miembros kan
TMG kinasohan panlulupig
Maatubang pa nin caso administrativo an tolong miembros kan
Traffic Management Group (TMG) afuera pa kan sinangatan na casong
rape sa City Prosecution Office kan Ciudad nin Naga kan 14 anyos
na victima.
An tolong mga suspechado na pigtago pa ni dating TMG regional
director Sr. Supt. Eduardo Bayangos an saindang mga pangaran
pigbisto na sinda PO2 Edgar Regidor C. Miguel, PO2 Joey G. Dorgay,
alias Jason asin sarong pigngaranan sanang John Doe.
Si TMG Chief Director General Errol Pan an nag-orden ki Sr. Supt.
Rudie Valoria Regional Director kan TMG Bicol na sangatan pa nin
caso administrativo an tolo nganing mag-atubang nin disciplinary
action sa saindang oficina asin dai na pag-arogan kan ibang
miembros kan TMG.
Nagluwas sana an mga pangaran kan tolong mga suspechado kan
isangat na ni Acting NBI Director Lauro Reyes an caso sa pagbalga
kan Acta Republica 1716 o an mapadapit sa child abuse Law. An NBI
iyo an nag-conducir nin investigacion kan reclamo kan14 anyos na
victima matapos abusohon soboot kan tolo kan Febrero 23, 2006 sa
laog kan lomang oficina kan TMG sa Barangay Concepcion Grande,
Cuidad nin Naga .
An caso criminal pigsangat kan Marzo 24, 2006 sa oficina ni
Prosecutor Romeo Tayo na may IS No. 2006-0486 asin nakatalaan na
padarahan nin subpeana an tolo nganing magsumiter man kan saindang
counter affidavit.
Sa investigacion kan NBI an victima waitress kan Diana Videoke Bar
na sadiri ni Villa Bautista harani sa oficina kan TMG. Pigsugo na
singilon kan saindang utang sa beer house sa bagong oficina kanTMG
alagad pinasunod sa lomang oficina mga perang metros sana an
distancia.
Mga alas 3:00 nin hapon nangyari an incidente mientras na
nagdadalan nin boldshow an mga suspechado ginibo an mga pang-aabuso
sa victima.
Completo na nin mga documentos an pigsangat na caso kabali na an
medical certificate, blotter sa Barangay Concepcion Grande asin an
affidavit kan may sadiri kan beer house na an victima saiyang
empeada bilang waitress.
An Bantay Familia ni Consejal Cecilia “Nene” De Asis nakatabang
man sa pag-indorsar kan caso sa NBI tanganing masangatan nin caso
criminal an mga suspechado
Si Bayangos nag-tolong bulan sana sa Bicol asin mga taohan niya an
mga suspechado na tulos nagdulag matapos kan incidente kan Febrero
23. Tolong veces pig-invitaran kan NBI an mga suspechado nganing
magpaliwanag kan saindang lado, alagad dai nagtunga enves an nag-aparesir
sana iyo si Bayangos asin Abogado.
