Pag-host kan
Palarong Pambansa
mawot pakiaram ni De Venecia
Apesar
kan kasundoan na kan mga regional director kan Department of
Education (DepEd) asin pagpabor na ni alcalde Edward Hagerdon kan
Puerto Princesa City na an Ciudad nin Naga iyo an maging
presentador kan Palarong Pambansa 2006, alagad nag-intervenir si
House Speaker Jose De Venecia na dapat ibalyo sa Ciudad nin Puerto
Princesa.
Kan gibohon an 16th DepEd National Mancom Meeting sa Ciudad nin
Naga kan Marzo 27, 2006 pig-raffle na an mga billeting center na
oocuparan kan mga delegacion hali sa 15ng region kan nacion. Aram
na kan mga DepEd regional director kun saen na lugar sa laog kan
ciudad an saindang nakoang billeting center.
Sa entrevista kan miembros kan prensa ki OIC Secretary Fe A.
Hidalgo na yaon digdi sa Ciudad nin Naga kan Marzo 27 nag-atendir
sa ManCom meeting saiyang pigbuyagyag na si De Venecia an gustong
mangyari ibalyo an pag-host kan Palarong Pambansa 2006 sa Puerto
Princesa City.
Paki-araman pa man nin politico an Palaro, alagad an mga regional
director nagkasurondo na an saindang napili iyo an Naga. Igwa nang
enot na decicion an ManCom sa ginibong miting kan Febrero 21, 2006
sa Kalibo, Aklan na itao digdi an pagpadalagan kan 2006 Palarong
Pambansa.
Si Hidalgo, ensigida kan Febrero 22, 2006 nagsurat ki alcalde
Jesse M. Robredo nag-iinformar na an sinambit na Palaro napili an
ciudad na iyo an maging presentador. Afuera pa kaini, saiya pang
tinuga sa prensa sa Ciudad nin Naga na nagkasundo na sinda
Hagerdon asin Robredo na digdi na gibohon an Palaro.
Nagsurat na si Hidalgo ki Presidente Gloria Macapagal-Arroyo na an
sinambit na palaro pinagkasurondoan na gibohon digdi na sagcod sa
ngonian mayong kasimbagan si GMA kun contra kaya ngani nagpadagos
na an saindang preparacion sagcod na an technical committee nag-inspeccion
na kan sports facilities asin billeting center na mayo man nin
problema kun igwa man iyan kaya nang resolveran kan City Hall.
An DepEd igwang P53 milliones na fondo para sa palaro asin ini
gagamiton kan manlaen-laen na delegacion, alagad posibleng
ipaluwas sana an P50 milliones. Si Robredo an nagsurat na ki DBM
Secretary Rolando Andaya, Jr. nganing padarahan nin ayuda
financial an City Hall para sa sinambit na palaro.
Si Andaya kan magin juespe de honor kan pagbukas kan Palarong
Bicol 2006 nagpahayag sa media na bilang sarong Bicolano saiyang
tatabangan nin fondo an ciudad sa sinambit na katuyohan.
