---

MAHUROT TRO SA CORTE SUPREMA

People's initiative ipapapundo kan IBP

ILLEGAL and unconstitutional an gibo ni Presidente Gloria Macapal-Arroyo asin kan saiyang mga pag-irba sa administracion sa pigpadalagan nang people’s initiative na sarong tulay para sa Charter change (Cha-cha) nganing makatipon nin 5 milliones na firma asin suportaran an pag-enmienda kan 1987 constitution.

CADIZ

Si IBP National President Joel Cadiz kan maconduciran nin entrevista kan Bicol Mail nagdenuncia ki PGMA sa mga salang gibo apesar na langtadan na ilegal alagad pigpapadagos an people’s initiative na ginagastosan nin milliones pesos na fondo kan gobierno. Igwa pang dapat na gastosan kan fondo kan gobierno bakong huli sa politica.

Igwa nang ruling an Corte Suprema na dai pa dapat an people’s initiative ta mayo pa nin implementing rules and regulation na ginibo an congreso, haloy na ining decicion kan panahon pa ni dating Presidente Fidel V. Ramos.

Feke an pag-gamit kan people’s initiative envez malinaw na government initiative huli ta an fondo hali sa gobierno asin an nagpapadalagan iyo an mga oficiales local sagcod na pigpahiro na an mga League of Municipalities of the Philippines, sabi pa ni Cadiz.

Sa saiyang iniciativo an Integrated Bar of the Philippines (IBP) na saiyang pinamamayohan nagtalaan nuodmang Viernes (Marzo 31) nin miting kan Board of Governor na saro sa pag-oorolayan an pag-cuestion kan people’s initiative sa Corte Suprema siring kan ginibo ninsa sa PP1017, EO 464 asin an Calibrated Pre-empted Response (CPR).

An paghagad nin temporary restraining order (TRO) sa Corte Suprema iyo an mayor nindang pag-oorolayan.

Sa dai mahahaloy piglalaoman ninda na an pinakahalangkaw na Corte sa nacion mapaluwas na nin decicion sa pag-cuestion ninda kan PP 1017, EO 464 asin CPR asin ini ginigibo ninda huli ta naliligis na an Bill of Rights kan namamanuan yaon naman an ilegal na people’s initiative. Saindang ginigibo ini nganing dai na pag-arogon an salang gibo kan administracion.

An fuersahan na pagpadagos kan signature campaign nganing dagos nang cancelaron an eleccion sa 2007 sa paaging ini may katuyohan na mahali an term limit ni GMA ta susog sa constitucion abot lang siya sa 2010.

Sinabi pa kan Bicolanong Presidente nacional kan IBP kun magpalis nin sistema gobierno pasiring sa parliamentario, puedeng mahali naman an term limit sa pagtukaw niya bilang Prime Minister.

Nagpatanid pa siya na an mga alcalde na nagcacampania sa signature campaign na nag-gagastos nin fondo kan gobierno, puede sinda sangatan nin casong anti graft and corrupt practices act kaya dapat maglikay an mga oficiales local sa mga directiva kan DILG.

Nangapodan paman siya sa mga taga Ciudad nin Naga asin Camarines Sur na isikwal an illegal and unconstitutional na gawi ni GMA na dapat maging vigilante nganing dai makalusot an arog kaining mga custionableng pagmando kan administracion.

Mientras tanto, si regional director Blandino Maceda kan DILG Bicol naglinaw na dai man sinda envuelto sa campania sa signature campaign sa pagsabay sa mga barangay assembly kan Marzo 25, 2006 envez an naghihiro sa pagcampania iyo an NGO.

An Sigaw ng Pagbabago Movement iyo an nag-aako na sinda an nagcacampania sa signature campaign nganing makatipon nin cienco milliones na firma nganing ma-enmiendaran an constitucion.