---

Embalsamador

(Editor’s Note: An parasugot nagbabalik. Poon sa aldaw na ini an mga surat ni Levy S. Aureus mababasa sa saiyang bagong column na “Sabi ni Levy”. Sa totoo sana, an “Sabi ni Levy” nagluwas na sa dyaryong “Bicol Daily” kan mga inot na aldaw. An nagsunod iyo an “Ilampog, Ilabay” digdi sa “Bicol Mail” na satuyang nabasa sagkod sa pagpahingalo ni Levy nin huli sa kamatian sa salud mga anom nang bulan an nakaagi. An “Sabi ni Levy” asin an “Ilampog, Ilabay” parehong putahe: igwa nin umaw, igwa nin tuyaw; nagsusurog, nagsusugot-lugod an sinugutan dai magkulog an boot; an joke at times funny, kun minsan corny, pero talagang makangisi. Ngonian, bakasyon na ngona an “Ilampog, Ilabay” i-welcome niato an “Sabi ni Levy”).

“WHO STABBED YOU”?, hapot ni Judge Malanyaon sa testigo na biktima nin saraksakan sa sugalan nin STL sa banwaan.

Dai nakasimbag sa hapot an nakubanan na testigo. Alagad nakiulay: “Puwede daw po judge na isalin sa Bikol an hapot ta dai ko po naintindihan”?

“Interpreter, isalin sa Bikol an hapot: Who stabbed you?”, an sugo ni judge sa interpreter.

Tulos-tulos man nagtubod sa sugo an interpreter: “SI-ISAY SI TABYO?”.

-oOo-
Valentine’s day. Nag-uulay an mag-ilusyon sa balkon. Sabi kan lalaki sa babae: “Baba, dai ka na daw magsulot nin bra nin huli ta sadit-sadit man an bukol mo sa daghan. Makanos helingon”!

Sabi kan babae sa lalaki: “Si Love man kun makataram nakakainsulto. Tinatsaran an pagsulot ko nin bra. Dai palan sabot ta sadit-sadit an bukol ko sa daghan. Siya man ngani mahilig magsulot nin brief”!

-oOo-
Sinugo kan ama an aki na magbakal sa sentro nin apat na dyaryo; Inquirer, Philippine Star, Manila Bulletin, asin Bicol Mail.

Pag-abot kan aki sa harong nagreport sa ama: “Dai napo nin Inquirer, Philippine Star, asin Manila Bulletin”!

“Anong dyaryo an nabakal mo”?, hapot kan ama.

“Apat na dyaryo man giraray: apat na Bicol Mail”, alistong simbag kan aki.

-oOo-
Magkumadre sinda Gloria asin Pia. Nagkahelingan sa beauty parlor. Nagkumustahan.

Sabi ni Gloria sa kumadre: “Sobra baga madi an pagka-slender mo. Naghelang ka”?

Simbag ni Pia: “Talagang maniwang ako sa ngonian. Igwa nin magabat na problema”!

“Risado sa lalaugon mo, madi. Igwa ka na pati nin eyebag. Tano, ano an problema mo”? hapot ni Gloria sa kumadre.

“kawasa si Pading Quintin mo, igwa nin overtime na trabaho sa harong baro-banggi. Dai ako napapaturog”, sumbong ni Pia ki Gloria.

“Iyo man baga si Pading Crispin mo. Igwa nin overtime na trabaho sa harong bara-banggi, pero sigue an turog ko”, sabi ni Gloria.

Sabi ni Pia: “Marhay na sana an agom mo maestro. An overtime na trabaho paggibo nin lesson plan”!

“Tano, ano an trabaho ni Pading Quintin sa ngonian”? hapot ni Gloria.
Simbag ni Pia: “Embalsamador”!