> Animal
Academy
An Amerikanong parasurat na si Mark Twain igwang magayon na sinabi
manunungod sa pag-adal. Sabi niya, “Kaipuhan kung pundohon an
sakuyang pag-adal kan ako maglaog sa eskwela.” Sinambit niya ini
nin huli sa pagtubod na bakong gabos na kaipuhan manudan nin
sarong tawo makuku’a sa laog kan klasrum. Ako mismo nagtutubod ako
na an buhay sarong proseso nin pag-adal. Ngonyan na Marso, dakul
na graduation exercises an nasaksihan ko asin kaiba naman digdi an
sakuyang mga estudyante sa katekesis asin mga napa-recollection.
Sa siring na panahon gusto kong ihiras an sarong istorya na
paborito kong alegorya kan klase kan edukasyon na pwedi tang
ibaing sa satuyang sadiring ekperinsya.
Manunugod ini sa Animal Academy na napagkaoroyonan na itugdok nin
apat na klase an hayop. Ini an mga gamgam, an sira, an damulag
asin an kabalang. Plinano ninda ini tanganing masimbagan an
dakulang pangangaipuhan kan ibang kahadean nin mga hayop. An
Animal Academy na ini iyo an madaog asin makwestiyon kan kakayahan
kan mga unibersidad kan iba pang nilalang. Bukas ini sa gabos na
hayop alagad mas priority ninda an mga pobreng sira, mga aki kan
OFW gamgam, mga labor union activists na damulag asin an mga
special children na kabalang. Siring sa ibang komunidad,
nagtiripon sinda tanganing pag-olayan an mga bagay-bagay na may
koneksyon sa pagpatugdok kan saindang Animal Academy asin an
pinaka-importante iyo na an mga subjects na itutukdo sa akademya.
Nagtaram an sira na dapat gibohon na subject an paglangoy asin ini
dapat na gibohon na mandato na an gabos na estudyante malaog sa
academy, magku’a kan nasabing subject. Dai man nagpahuri an gamgam,
sinabi niya man na kaipuhan na ibale an paglayog sa kurikulum
nganing mas maging globally competitive sinda. Pagkadangog kaini,
dai man nagtugot an damulag na dai itukdo an pag-arado sa mga
agiging estudyante kan academy. Asin an kabalang na iyo
napagdesisyonan na magiging principal nagpahayag man na an
pagkakan nin kuto itukdo sa mga kapwa niya hayop. Haros nagsarong
aldaw si pag-orolay na hinona kan gabos na dai na madadagos.
Alagad tanganing dai nang ribok asin gabos man miyembro kan board
of trustees, napag-oroloyan na an gabos na kamawotan kan mga hayop
papa-onrahan asin gigibohon na compulsory subjects sa academy.
Nagbukas an Animal Academy kasu nakaaging bulan nin Hunyo, dakul
na hayop tulos an nag-enroll ta mas marhay daa ini kisa sa sikat
na call center kan mga tawo. Kan magbukas an akademya, tinukdoan
an maglangoy an gamgam, damulag asin kabalang. Tinukdoan man na
maglayog an mga sira, damulag asin kabalang. Tinukdoan man na
mag-arado sa bukid an mga gamgam, sira asin kabalang. Tinukdoan
man na magkakan nin kuto an sira, gamgam asin damulag. Nin huli ta
exclusive school an Animal Academy, sanggatos sanang estudyanteng
hayop an inako sa eskwelahan. Sa Sanggatos na ini, 20 damulag an
nagadan mantang pigtutukdoan na maglayog, 20 gamgam an nalamos
mantang pigtutukdoan na maglangoy, 20 sira an nagadan mantang
pigtutudoan na magkakan nin kuto 20 kabalang an nagadan mantang
pigpapaarado sa bukid. An natatadang 20 irido ngonyan sa ospital
asin daing graduation ngonyan na bulan nin Marso.
Sa maabot daang taon mabukas giraray an nasabing eskwelahan alagad
matutok na sinda sa Arts asin sa Culture.
