"Shabu tiangge"
sa Naga
sinakyada kan task force
An
Inter-Agency Anti-Crime Task Force na pinamamayohan ni bise
gobernador Salvio Fortuno kan Camarines Sur sinakyada an “shabu
tiangge” sa Doña Clara Village, Barangay Concepcion, Ciudad nin
Naga na nagresulta sa pagkaka-arestar kan mga suspechado na sinda
Sajamin Sangacala y Dimaporo, alias Amin, 25 asin an saiyang
live-in partner na si Jessica Galangue y Pelono, 25, parejong nag-eerok
sa sinambit na barangay.
Si S/Supt. Romeo Mapalo, PNP Provincial Director kan Camarines Sur
nagsabi na an operacion ginibo kan Marzo 27, mga alas 8:20 nin
banggi kan pinagsarong fuersa kan intelligence Section kan PNP
Provincial Office, Philippine Drug Enforcement Agency (PDEA) asin
kan Anti-Crime Task Force na pinangenotan ni P/Supt. Victor C.
Valencia, kaibahan sinda P/Supt. Raul Hebrio, Inspector Roger L.
Medalla,asin mga miembros kan PDEA.
Sinda armado nin search warrant na pig-isyu ni Executive Judge
Pablo M. Paqueo kan RTC sa Cuidad nin Naga. Testigos sa ginibong
pagsakyada sa pigsasabing “shabu tiangge” iyo sinda barangay kgd.
Danilo Morano asin Claro Division kan Brgy. Concepcion Pequeña.
Nasamsam kan mga elementos kan awtoridad iyo an 4.6 gramos nin
shabu, tolong sadit na heat sealed plastic jacket asin P25 mil na
marked money na ginamit sa ginibong buy bust operation.
Sa entrevista ki Mapalo saindang pig-conserar na “shabu tiangge”
an lugar na sinakyada huli ta dakul na an regular na costumer kan
mag-live in partner asin ini iyo man an pagtubod ni Barangay
Capitan Ricardo Reglamos kan kaparejong barangay, huli kan regular
an transaccion.
Igwa pang pigmaman-manan an task force sa laog kan sinambit na
barangay na envuelto sa ilegal na actividad kaya iyo na ini an
lugar sa Naga bilang “shabu tiangge”.
An mga suspechado an sinangatan na nin caso sa pagbalga kan RA
9165 asin detinido na sa Naga City District Jail sa BJMP sa Brgy.
Del Rosario.
An sinambit na task force may katuyohan na labanan an mga
nangyayaring criminalidad sa laog kan Ciudades kan Naga asin Iriga
asin Camarines Sur. Kabali sa saindang mission iyo an campania sa
human smuggling na posibleng kasabuat an sarong dakulang
negocianteng intsik sa Naga.
An report kan PNP Provincial Office dai kabali sa operacion an
Naga City Police na pinamamayohan ni P/Supt. Ramon Ranara, alagad
sa pigsumitir na report sa Peace and Order (POC) kan City Hall an
sinambit na pagkakadakop kan duwang drug pusher kabali an policia
kan ciudad.
Narecibe ni bise alcalde Gabriel H. Bordado, Jr. an report kan
Naga City Police sa ginibong POC meeting kan Marzo 28, 2006.
