COP Ranara zero sa campania vs jueteng
Nagkakaigwa man nin 100 por cientong crime solution efficiency kan
bulan nin Febrero 2006 an Naga City Police sa liderato kan
paluwason na Chief of Police P/Supt. Ramon Ranara, alagad dai pa
macoconsiderar na dakulang acomplisimiento huli ta zero sa
pagdakop kan mga envuelto sa jueteng sa saiyang area of
responsibility.
RANARA
Ini an reclamo ni Alcalde Jesse M. Robredo ki Ranara apesar na
mahiwasan ang tarayaan sa jueteng sa mga barangay kan Naga, dai
man nagpaheling kan saiyang kakayahan na ipadakop an mga correador
na nagkukuriyat na sa ciudad.
Si Chief Inspector Nicanor Garcia kan mag-atubang sa regular na
miting kan Peace and Order Council (POC) nagconfirmar kan mahiwas
na colection sa jueteng sa 27ng barangay kan ciudad sagcod nagsabi
na bakong coleccion sa E-Z 2 an operacion kabaliktaran kan mga
pahayag ni P/Sr. Supt. Romeo Mapalo, PNP provincial director na an
mga nagkakadarakop sa sugal iyo an mga correador sa E-Z 2 kan
Philippine Charity Sweepstakes Office (PCSO).
Si Robredo iyo an regional coordinator kan Pagkasararo laban sa
jueteng sa Bicol na organisar kan pagvisita ni Obispo Oscar Cruz
na presente si Ranara kan paglansar kan campania contra sa
sinambit na sugal mayo man nin mga apprehension report an Naga
City Police mahali nalang an jefe de policia.
An pamayo kan policia kan Naga, ipinahayag na maluwas na sa
saiyang destino digdi huli ta nakatalaan na mag-schooling para sa
saiyang promotion.
Pigngalasan si Ranara na apesar kan saiyang pagsuporta sa
resolucion kan POC na naghahagad ki PNP Chief Director General
Arturo Lomibao na ipapundo an operacion kan sinambit na sugal,
alagad dai man siya nagpaheling nin sinceridad nganing magtabang
sa campania na mapundo an controvercial na sugal na jueteng.
An jefe ejecutivo local an naghahalat na kan final na listahan na
mga nominado kan Bicol PNP command nganing iyo an saiyang
pagpilian na iriribay ki Ranara.
Maagi sa dating proceso sa Sanggunian Panlungsod kun siisay an
calificado na maging bagong jefe de policia kan ciudad.
