NFA ulang sa paglangkaw kan precio
kan bagas sa mercado
Daet,
Camarines Norte- An precio kan bagas sa mga mercado puedeng
magsakat sagcod sa P30 cada kilo kun dinagos kan gobierno nacional
an pagsa-privado kan National Food Authority (NFA) huli ta mayo
nang baratong precio nin bagas na ma-competencia sa mga commercial
rice.
An 80 por ciento kan mga NFA rice pigdidistrubuer sa mga
awtorisadong tiendahan kan NFA sa mga mercado asin an 20 por
ciento sa mga barangay nganing maulang an pagparalumpat kan precio
kaini.
Si Provincial Manager kan NFA Bernardo Asetre kan Camarines Norte
nagpahayag na dakulang bagay an distribucion ninda nin supply nin
bagas sa mga mercado huli ta ini an programa kan saindang agencia
nganing mapugolan an mga opurtunistang negociantes na
magparalangkaw kan precio dawa abunda an supply nin bagas sa
mercado.
An NFA haloy nang pighace kan gobierno nacional na isa-privado kan
panahon pa ni dating Presidente Fidel V. Ramos sagcod ngonian na
Arroyo administration sa dahilan na an sinambit na agencia kabali
sa mga government-owned control corporation na nalulugi.
Dai dapat maglaom an gobierno na mag-ganancia sinda nin milliones
pesos huli ta palugi ngani an saindang negocio ta bagsak an precio
kun icocomparar sa mga privadong comprador na kaipuhan makabawi
kan saindang negocio sa paagi nin pagpalangkaw nin precio, sabi pa
ni Asetre.
Sa ngonian an NFA rice cantidad P18.00 na an cada kilo mientras na
sa mga commercial rice nagsasakat na nin sagcod sa P25.00.
Tabang sa mga paraoma an katuyohan kan pagkakatugdas kan NFA bako
lang magpabakal nin baratong precio kan bagas envez pati na an
pagtungod nin paroy halangkaw pa an precio, kaya ngani dai man
maglaom an gobierno nacional na magka-igwa sinda nin milliones
pesos na ingreso.
An stock nin bagas sa bodega kan NFA 100 por ciento nang mga
imported rice mayo na nin local na produkto mientras na hababa na
an produccion huli ta afectado na kan mahiwas na mga convesion kan
kaomahan sa industrial afuera kan ginigibo nang mga subdivision.
