People's initiative masikad na sa CSur
Campania papangenotan kan DILG, oficiales
local
An
mga oficiales local asin an DILG an magtatarabangan sa campania sa
people’s initiative nganing itulod an charter change asin ini
masikad sa masunod na semana pighahalat nalang an forma gikan sa
oficina central kan DILG.
Pigtalaan kuta na kan enot na semana ngonian na Marso 2006,
naabala sana huli kan nangyaring tension sa Manila sagcod
nagdeclara si Presidente Gloria Macapagal-Arroyo kan state of
National Emergency o an PP 1017.
Si Alcalde Mel Gaite kan Baao, Camarines Sur asin pamayo kan
League of Municipalities of the Philippines (LMP) Camarines Sur
Chapter nagsabi na sa programa kan DILG oras na makaabot ngonian
na semana an mga forma nakatalaan ponan tulos an campania huli ta
an target dapat matapos an people’s initiative sa huring aldaw kan
Marzo 2006 asin sa bulan nin Junio iyo na an pigtalaan na
plebisito.
An mga regional director kan DILG an naglarga pasiring sa Manila
kasuodma nganing iyo an magkoa kan mga forma asin idistribuir sa
manlaen-laen na mga banwaan.
Sa people’s initiative kaipuhan sana an tres por cientong pirma
cada distrito sa registradong votantes kan Commission on Election.
An ULAP bilog an suporta sa charter change nganing maribayan an
sistema kan gobierno pasiring sa parliamentary system kaya sinda
an kabali sa pagpahiro kan saindang taohan para sa people’s
initiative.
Sinabi ni Gaite an gigibohon kan mga jefe ejecutivo local manombra
nin mga coordinator nganing maging katuwang sa pagpaliwanag kan
katuyohan kan people’s initiative nganing masunod na an
pag-enmienda kan 1987 constitution.
Sa saindang banwaan pinaapod na si mga capitanes de barangay
igwang pavor asin contra kaya ngai dai ninda oobligaron an
oficiales de barangay kun dai masuporta sa people’s initiative.
An pamayo kan LMP sa Camarines Sur an naglantad na nin suporta sa
pag-enmienda kan constitution nganing maresolveran na an
nangyayaring crisis sa politica sa nacion.
Mientras tanto, si bise alcalde Norman Badiola nagsabi na sala an
apod na people’s initiative envez government initiative huli ta an
mga recursos gikan sa fondo kan gobierno.
Dai nagsusuporta si Badiola kan sinambit na campania sa cha-cha
huli ta gagamiton an personajes kan gobierno asin fondo alagad
inaapod na people’s initiative.
Si House Speaker Jose De Venecia asin an mayoriang miembros kan
Camara-Baja iyo an nag-gigibo nin gabos na mga paagi na mangyari
na an cha-cha asin huli kan pag-contra kan Senado gagamiton ninda
an people’s initiative masunod sana an saindang ambicion.
