CIUDAD nin Legaspi - Pakatapos kan Palarong Pambansa 2006 an Department of Education (DepEd) Bicol nag-aandam na kan panahon nin pagpalista kan mga estudiantes sa mga escuelas publica ngonian na maabot na school year 2006-2007 sagcod na pig-aandaman an paglangkaw kan pagpalista na magsakat sa LAYON 1.4 milliones sa elementaria asin sa secondaria.
Malangkaw nin 2 asta 3 por ciento an mga nagpapalista, alagad kulang nin 1,700 na mga paratukdo asin nagpapadagos na kakulangan nin mga classroom nin sagcod sa 300 sa anom na provincias kan kabikolan.
Ini an mga pahayag nin Director Celedonio L. Layon, Jr. kan DepEd Bicol sa ginibong entrevista kan Bicol Mail kasuodmang hapon.
An solucion kan DepEd na si dating minimum na 40ng mga estudiantes sa cada classroom sinasagad nin 70 asta 80. Ini an paagi nganing an gabos na mga pobreng familia makapa-adal kan saindang aki sa mga public school dawa na ngani kulang nin mga classroom asin paratukdo, sabi pa ni Layon.
An mga school division supt. sa mga provincia an haloy nang naghahagad nin dagdag na paratukdo, alagad dai man nasisimbagan kan saindang oficina central huli kan kakulangan nin fondo.
Dinagdag pa ni Layon na dai man siya uyon sa mga pahayag ni dating DepEd Secretary Florencio “Butch” Abad na 94 por ciento kan mga nagtapos sa elementaria dai pa preparado sa pagclase sa high school. Digdi sa region cienco nasa 25 por ciento sana sa tahaw kan ginigibo na nindang pagpalangkaw kan calidad kan educacion sa mga escuelas publica.
Alagad inako kan pamayo kan DepEd na dakul an mga nagtapos sa elementaria asin segundaria an dai nakakabasang sulo. Sa research kan panahon ni DepEd Secretary Abad naabot sa 75 por ciento.
Dakula pa an por cientaje na nagtapos nin grade VI sa mga escuelas publica alagad an saindang competence level nasa grade IV.
Ngonian na school year 2006-2007 an DepEd nasa ika-tolo nang taon sa pag-implementar kan High School asin Elementary Readiness Test.
An mga local na gobierno an nagtatabang na sa DepEd huli ta igwa man sindang sadiring pinapaluwas na fondo local sa mga paratukdo. An problema dai man giraray na tatawan nin atencion padagos na nagkukulang nin mga paratukdo.
Mientras tanto, sinabi pa ni Layon na antes kan burokasan nin clase sa Junio 2006 nakatalaan na magpaconducir sinda nin seminar sa mga paratukdo sa subject kan english, math, asin science. An katuyohan kan oficina regional nganing mas mapatibay an saindang kaaraman sa pagtukdo sa sinambit na mga subject.
