GOA, CSur - Gabos na transaccion sa local na gobierno sa banwaan na ini gigibohon na sa bagong edificio na pinatindog sa barangay Tagongtong poon sa maabot na Lunes, Mayo 15, 2006, digde.

        Segun ki Mun. Administrator Arnulfo Picaso, may pagboot na si Alcalde Marcel S. Pan na an gabos na oficina sa irarom kan gobierno local ibalyo na hali sa presenteng daan na municipal hall sa barangay La Purisima, pasiring sa moderno asin mas dakulang Goa Government Center building sa nasambit na lugar ngani makasabay sa gigibohon na “inaugural flag ceremonty” sa maabot na Lunes.

        An bagong government center itinugdok sa 2.8 ektaryang lote sa cantidad na P23 milyones sa pagmaigot ni Pan asin pag-iriba sa local na gobierno na magka-igwa an banwaan nin sarong modernong edificio na eestaran kan gabos na departamento kan LGU saka kan gabos na agencias de gobierno nacional na nakadestino sa banwaan.

        Piglinaw pa man ni Pan na an oficial na inaguracion kan proyecto gigibohon sa Hunyo 23, ngonian na taon asin imbitado sa ocacion iyo si Senador Jinggoy Estrada. (Ed Salvo)