Pili, Camarines Sur- 15ng mga Liga ng Barangay President sa 36 na mga banwaan sa Camarines Sur an padagos pang nagsisinutil dai nagbabayad kan saindang annual dues na cantidad sana man na P1,000.00

        Kun dai sinda masunod sa reglamento kan Liga kun may kamatian sa salud afectado an saindang medical insurance kabali na an libreng operacion sa kidney, sa puso asin iba pang mga major operation sa hospital.

        Si Liga President Domingo Briones nagpahayag na mayo naman sindang magiginibo huli ta haloy nang pigpagirumdum man sagcod si pinakahuring regular meeting kan nagtalikod na bulan nin Abril 2006.

        An P1,000.00 na annual dues an P500.00 nadalagan sa saindang national Liga asin an P500.00 sa provincial Liga. An record kan Liga nagluluwas na igwa pa ngani kan taon 2003 o may apat nang taon dai nagbabayad kan saindang mga obligacion.

        An fondo dai man naghahali sa personal na bulsa kan pamayo kan Liga envez sa fondo kan saindang Liga sa banwaan. Duda an ibang mga oficiales kan sinambit na Liga sa Camarines Sur na nagamit na an fondo mientras na ini para sa sainda man sanang beneficio.

        Igwa nang Liga President sa premirong distrito kan Camarines Sur an sinangatan nin caso kan saindang miembros huli ta apesar pigrecibe na si fondo sa pambayad sa annual dues, alagad dai man pigbabayad na afectado digdi si medical insurance kan mga officials de barangay. An caso iyo man an nakapirit sa pamayo kan liga na dai na pigngaranan na magbayad kan sinambit na obligacion.

        Mientras tanto, nakatipon nin sagcod sa 25 por cientong firma sa people’s initiative an Liga sa Camarines Sur huli kan suporta kan mga oficiales de barangay na sobra pa sa dapat sanang 3 por ciento.

        Sinabi ni Briones na an saindang suporta sa people’s initiative bilang pagpaheling nin suporta man ki Presidente Gloria Macapagal-Arroyo sa pigtutulod na pag-enmienda kan 1987 constitution.

        Mga 98 por ciento kan mga capitanes de barangay sa Camarines Sur an naging activo sa pagtabang sa signature campaign na nasa likod man digdi iyo an ULAP.