IRIGA CITY- Anom na kalalakihan an tinuruklo kan mga awtoridad sa liderato ni P/Supt. Tomasito Clet sa actong nagcoconducir nin treasure hunting sa pamitisan kan Mt. Asog sa may parte kan Brgy. Sto. Domingo sa Ciudad na ini kan nakaaging semana.

        An mga treasure hunters pigbisto sa pangaran na Roberto Nava, Rey Nacario, Marlon Bistoy asin Policarpio Nacario, anas residentes kan Barangay San Nicolas, Pedro Monge kan Brgy. San Juan asin Politico Nava kan Brgy. Sto. Domingo.

        Susog sa pahayag kan mga awtoridad, mismong si Alcaldeza Madelaine Alfelor-Gazmen an nagduhol kan informacion sa sainda dapit sa illegal na actividad kan mga “Gold Diggers” na nagdurar na nin haros duwang semana.

        Huli kan naging acomplisimiento kan local na PNP, kinarigos nin pag-omaw ni Alfelor-Gazmen an grupo ni Clet kasabay kan pahayag na na pangyayari sarong pruweba na an mga pulis katuwang kan saiyang administracion sa pagpoho kan gabos na ilegal na actividades sa ciudad.

        Katakod kaini, inaadalan na ngonian kan City Hall an pagmukna nin sarong complaint desk dapit sa mga nagbubungkaras na ilegal na actibidad nganing tolos na makapagresponde an mga awtoridad.

        Padagos pang pigsusukit kan mga awtoridad kun an mga nasakoteng treasure hunters sa Sto. Domingo kan naka-aguing Miercoles (April 26, 2006) iyo man an nasa likod kan naenot nang report na treasure-hunting activities sa Brgy. Cristo Rey, Antipolon asin iba pang barangay sa palibot kan Mt. Asog.

        Naenot kaini, an oficina kan Alcaldeza nagpaluwas nin sarong Executive Order sa katuyuhan na orog pang maibitaran an pag-abuso sa palibot kan Mt. Asog, pagkatapos na madiscubre an burak kan Rafflesia na pigcoconsiderar na pambihira o rare species minsan ngani an parong mabatang talaga, susog sa estorya kan mga nagturukad na sa bukid kan Iriga. (Romeo Olea)