PILI, Camarines Sur - Kun masunod sa guidelines kan Civil Service Commission (CSC) an compulsary retirement kan oficial/empleados kan gobierno puedeng ma-extendir nin anom na bulan. Alagad si Regional Executive Director Balagtas Torres kan Department of Agriculture (DA) sa Bicol nakatulo nang veces pinag-extendir an saiyang servicio ni DA Secretary Domingo Panganiban.

        Si Torres, sa ika-tulong veces napalawig pa an saiyang servicio sa gobierno asta sa Julio 31, 2006. Apesar na matapos na kuta an ika-duwa niyang extension sa puesto kan Abril 31, 2006.

        Sa entrevista kan Bicol Mail sa paagi nin telepono ki Ms. Catherine Pielago kan Legal Division kan CSC Bicol kun masunod sa guidelines kaipuhan sana an sarong anom na bulan na extension sa servicio sa gobierno kan maretiro na sa puesto.

        Alagad sinabi kan CSC Legal Division sa Bicol kun igwang kahurotan sa oficina Central magdedefende na sa sainda kun kinakaipuhan na aprovaran.

        Naging controvercial an enot na pag-asumir ni Torres sa puesto kan Septiembre 21, 2005 kan cuestionon ni dating OIC Director Hector Sales an saiyang mga papeles hali sa Malacañang asin kulang nin documentos hali sa central office kan CSC.

        An natutuyawan na DA regional director dapat nagretiro kan Agosto 31, 2005, pig-extendir ni panganiban asta Febrero i, 2006. Antes kan Febrero 1, si assistant regional director Jose Dayao igwa nang napupugolan na Special Order na firmado ni Secretary Panganiban na pigdesignar bilang OIC Director ini sa recomendacion ni Torres. Kan magbalik si Torres hali sa Manila nakakoa naman nin extension of service hali ki Panganiban.

        Naglalaom na an mga oficiales asin empleados kan DA Bicol na si ika-duwang “extension of service” dapat magpaso na kan Abril 31, 2006, dai pa nacontento naghirit pa nin pagpalawig sa puesto abot sa Julio 31, 2006.

        An DA Director dayupot ki Sec. Panganiban huli ta dating ka-clase sa U.P. Los Baños. Mas lalong naging decidido siya na magtrabajo asin mapalawig sa oficina matapos makapuntos siya ki Sales kan ibasura kan Corte an pighahagad na temporary restraining order kan mag-asumir ini sa puesto kan Septiembre 21, 2006. Dai pig-ondra kan corte an peticion ni Sales huli ta ano man na oras puede siyang ribayan mientras na OIC Director sana an kamugtakan kan saiyang puesto.