San Fernando, Camarines Sur - Saro an gadan asin siyam an iredo sa nangyaring banggaan kan pampasajerong jeepney na may rutang Naga-Ragay asin kan sarong motorsiklo na si nagmamanijo an tulos binawian nin buhay sa accidente mga alas 4:20 nin hapon kan Mayo 1, 2006 sa Maharlika Highway.

An victima si Edison San Jose, 30 taga San Isidro, Pamplona, Camarines Sur mientras na an siyam na mga iredo na pasajero kan jeepney pigdalagan sa Bicol Medical Center asin sa St. John Hospital sa Ciudad nin Naga.

Photo Caption: ACCIDENTE SA MAHARLIKA HIGHWAY. Retrato sa itaas nahulog na pampasajerong jeep matapos magkabangaan an motorsiklo sa Brgy. Pilar, San Fernando, Camarines Sur. Gadan an chofer kan motorsiklo na declaradong DOA (retrato sa ibaba) kan idalagan sa hospital.

        Sa investigacion kan San Fernando Municipal Police Station an jeepney na pigmamanijo ni Heramabeff A. Delos Santos, 31, kan Busac, Libmanan, Camarines Sur nagdadalagan pasiring sa Ciudad nin Naga asin kan biglang mag-overtake an motorsiklo kan victima sa sarong vehiculos suminalpok an sinambit na motorsiklo na may plate no. EH-9826 sa pampasajerong jeep.

        Nagliko paman kuta pawala, alagad mayo nangnaginibo nawaran nin control sagcod na nahulog an jeepney sa dakulang drainage sa Barangay Pilar, San Fernando. Sa 13ng mga pasajeros an siyam (9) mga iredo na tulos man pigdalagan sa hospital.

        An chofer kan jeepney an duminolag pasiring sa Ragay, Camarines Sur sagcod na nagsuko sa Ragay Police Station asin kinaagahan kan Martes (Mayo 2) pigsuko na sa policia kan PNP San Fernando.

        An victima na hali palang sa fiestahan sa Milaor, Camarines Sur paulion na sa saindang residencia sa Pamplona may tama sa payo na iyo an posibleng dahilan na binawian tulos nin buhay.

        An operator kan sinambit na jeepney na may plate no. DHK-557 si Hermigildo A. Santos kan Busac, Libmanan, CamarinesSur tugang man sana kan chofer.