SI PNP Chief Director General Oscar C. Calderon, pig-orgullo ki alcalde Jesse M. Robredo kan Ciudad nin Naga na huli kan agresivong campania kan PNP contra sa ilegal na sugal na jueteng napundo na an operacion kaini sa Camarines Sur asin Camarines Norte.
Sagcod sana sa papel an pag-orgullo ni Calderon sa campania laban sa jueteng mientras na balik naman an regular na centralisadong operacion sa Camarines Sur matapos kan nagkapera sanang aldaw napundo.
Nabuhay liwat an ilegal na sugal nakatalaan na isombong giraray ni Robredo sa PNP Chief an mahiwas naman na operacion kan jueteng.
Sa ngonian an mga gugoan ginigibo sa mga banwaan kan Libmanan, Bombon, Camaligan, Pasacao, Goa asin sa iba pang mga lugar na dati nang pig-coconduciran kan tulong veces na pagbola kan jueteng cada aldaw.
Sa surat kan jefe kan PNP ki Robredo, petsado Octubre 9, 2006 sinabi niya na kan mag-asumir siya bilang PNP Chief, pig-activar niya an Anti-illegal Gambling Operation Task Force (AIGSOTF) sa liderato ni P/Director Jesus A. Verzosa.
Mawot niyang ipasunod an pagpuho na kan sinambit na sugal bako lang digdi sa rehiyon cienco, alagad sa mga lugar kan Luzon, saindang estrictong pig-iimplementar an 1-3-2 strike policy sa ilegal na sugal na kun haen 12ng mga jefe de policia an pighaklas sa puesto kabali si P/Supt. Reynaldo B. Bataller, COP kan Ciudad nin Tabaco sa provincia nin Albay.
An sinambit na comunicacion kan PNP Chief sa alcalde bilang kasimbagan sa kahagadan na dapat mapundo na an jueteng sa Camarines Sur asin sa Ciudad nin Naga.
Napag-araman kan Bicol Mail na an operacion kan jueteng sa Camarines Sur an balik naman na mayong ginigibong accion an mga provincial director kan magkataid na provincia.
Si Robredo an nagpahayag na an liderato nacional an pueding makapundo kan sinambit na sugal mientras na mayo man nganing nagiginibo si PNP Provincial Director Romeo Mapalo. An mamundo apesar kan surat kan jefe kan PNP, alagad dai man nin efecto huli kan pagkabuhay liwat kan sugal na ini poon kasuodmang tudos lo santos.
