Magrurukyaw na sa kaogmahan an sindicato sa droga sa Ciudad nin Naga asin Camarines Sur matapos confirmaron ni NBI Director Nestor Mantarin ki Regional Director Ricardo A. Diaz kan NBI Bicol na sarong dakulang politico sa Camarines Sur na dai pinangaranan iyo an naghuhurot na haklason siya digdi sa rehiyon cienco.

        Sa ginibong NBI Command Conference kan Septiembre 11, 2006, sinabihan na ni Mantarin si Diaz na plano nang i-recall sa central office nganing magkapot nin duwang division asin magiging pang-oficial na parapahayag kan NBI.

        Si Mantarin nag-aatendir ngonian sa Interpol Conference sa Brazil asin sa laog nin duwang semana poon ngonian nakatalaan nang i-implementar an recall order.

        Halat na ni Diaz an recall order hali sa saindang director mientras na pighahaboan na ngani kan ibang oficial an sinambit na puesto digdi sa Bicol.

Photo Caption: HIDDEN CAMERA KAN MGA DUROGISTA. Parte kan mga nasamsam na evidencia kan NBI Bicol sa safehouse kan drug pushers sa Dimasalang St., Sta. Cruz asin Balatas, parejo kan Ciudad nin Naga afuera kan mga shabu asin armas.

        Ini an pigbuyagyag ni Diaz kasuodma sa miembros kan media sa tahaw kan saiyang campania sa ilegal na droga na kun haen 32 an nakoa nindang search warrant gikan sa corte nganing magkadarakop an mga envuelto sa droga. An 15 sa sinambit na numero an mga na-arestar asin 20 nag-aatubang na nin caso sa pagbalga kan Acta Republic 9165.

        Igwa pang 28ng mga drug pusher an target ni Diaz, ma-igigilid sana ini oras na haklason na siya sa Bicol. Maabot pa sa 60 por ciento an operacion kan droga sa Naga asin Camarines Sur asin napilay na ninda an 40 por ciento.

        Apesar kan marhay na performance kun icocomparar sa mga nakaaging administracion kan NBI regional office sa laog pa sana nin apat na bulan sa puesto mawot na siyang sikadan sa puesto kan politico.

        Posibleng may naligis siya sa campania sa ilegal na droga asin iba pang motivo na dai naman pigbuyagyag.

        Tulos man nag-accion an City Hall nagpasar nin resolucion na naghahagad ki Director Mantarin na dapat iretiner si Diaz huli kan pakikipag-laban sa operacion sa ilegal na droga asin pagkaka-resolver kan nagkaperang mga caso criminal.

        Afuera pa kaini, an multi sectoral group sa Ciudad nin Naga asin Camarines Sur naghahace na sinda mismo personal na magvisita sa oficina ni Mantarin nganing bako sana sa resolucion kan Sanggunian Panlunsod envez ipaheling an saindang bilog na suporta sa NBI Regional Director. Si Consejal Julian Lavadia, Jr. an naghurot na kaini ki bise alcalde Gabriel H. Bordado bilang acting presiding officer kan Naga City Peace and Order Council.

        Inako ni Diaz na nagkaperang mga kaibahan niya sa NBI Bicol an dai uyon sa saiyang liderato sa dahilan na gusto sana ninda sagcod sana sa table investigation an saindang trabajo, habo kan mga ginigibong pagsakyada sa droga, mga pakaang-kaang lang an trabajo asin kabali sa kinaanggot iyo an paghali na sa trabajo sa pagkapot kan caso sa BP 22 envez tawan niya prioridad an investigacion sa mga heinous crime.

        Nagpatanid pa si Diaz na sagcod na yaon pa siya digdi sa Bicol an saiyang mission ipadagos an campania sa ilegal na droga asin pagresolver kan mga caso criminal.

        Sinabi pa kaini, na an pagkaka-destino niya digdi huli ta nagsunod sana siya sa orden kan saindang oficina central mientras na halangkaw nganing puesto an saiyang pinupogulan bilang jefe kan Interpol.

        An NBI Bicol pig-hahaboan na ngani huli kan si enot na nangyari ki Director Lauro Reyes pig-peticion kan media ngonian siya naman an pig-iinitan kan politico na paribayan sa puesto.