An AFP asin PNP an nag-alerto kan saindang tropa contra sa mga rebeldeng NPA ngonian na panahon kan Peņafrancia fiesta sa posibleng paghasok nin kariribokan sa mga actividades kan celebracion. Nagwarak na sinda nin mga miembros kan intelligence group nganing ma-monitor an saindang actividad.
Alagad an City Hall mina-apelar sa mga nanunongdang na padanayon an katuninongan ngonian na kapiestahan ni Ina particularmente kan nasa militar asin NPA na magtarabangan para sa katrangkilohan dawa mayo nin declaracion kan unilateral ceasefire.
Si bise alcalde Gabriel H. Bordado, Jr. nagsabi nganing magdanay an matuninong na celebracion kan regional fiesta sa Bicol igilid muna an ano man na fuersa na mag-iriwal durante sa kapiestahan.
Kan taon 1989 an Sanggunian Panlungsod nagpasar nin resolucion numerado-89-137 na mina-apelar sa mga nanunongdang na padanayon an pace orden sa panahon kan kapiestahan ni Ina. Pigdeclara pa kaidto an Zone of Peace Freedom and Neutrality (Zopfan), sagcod na dapat rumdomon giraray ngonian na fiesta an tunay na katuninongan.
Si Brig. General Napoleon Malana, Commanding General kan 9th Infantry Division namay base sa Camp Elias Angeles, Pili, Camarines Sur nagpahayag sa miembros kan prensa na igwa na sindang pinahirong miembros kan intelligence group kan militar nganing magsubay-bay kan mga kalaban kan gobierno na makikisabayan sa maabot na fiesta.
Sa PNP Provincial Office si Sr. Supt. Romeo P. Mapalo, provincial director nagsabi na mabugtak man sinda nin mga check point sa mga estratihicong lugar sa Maharlika Highway.
An AFP asin PNP igwa nang coordinacion sa pagmantenir kan pace orden asin pagsabat sa ano man na grupo na mahasok nin kariribokan.
Alagad si Bordado nagsabi na sa haloy nang panahon sa kapiestahan ni Ina mayo sindang aram na nagparibok an mga rebeldeng NPA. Kun igwa man pueding magparibok iyo an mga terorista na kabali sa mga pigsusubay-bayan kan militar.
Sa pagtao nin higot na seguridad an PNP nagpadara na nin 120ng miembros kan augmentation force na iyo an mamantenir kan pace orden sa panahon kan kapiestahan.
