AN junta directiva kan Camarines Sur II Electric Cooperative (Casureco) Inc., dai pa nag-aatras kan plano na buhayon giraray an resolucion na maglaog sa Investment Management Contract (IMC) dawa na ngani enot nang binasura an resolucion sa ginibong general membership meeting sa Bombon, Camarines Sur kan nagtalikod na taon.

        Si paluwason nang director Pedro Balid kan distrito nin Minalabac nagconfirmar sa Bicol Mail na naghihiro pa an saindang mga pag-iriba nganing marealisar an contrata sa IMC. An saiya man na panindugan matugotan siya kun igwa nin marhay na mga condiciones para sa mga consumedores asin halion an babayadan na P600 mil sa gigibohon na pag-aadal kan Castalla.

        Kan aprovaran an resolucion an nag-opnir sana iyo si director Francis Soler kan Naga South District asin sa ngonian nagbabago na an panindugan ni Balid huli ta kun kakapotan nin privadong corporacion an cooperativa an ferming nasa utak ninda iyo an halangkaw na revenue.

        Maging si director Soler an nagpahayag na igwa nang lakdang sa laog kan junta na ipadagos an paglaog sa IMC, alagad nag-asegurar siya sa mga miembros consumedores na liwat niyang uulangon.

        Dai suportado ni Soler an resolucion sa IMC huli kun mga privado nang corporacion an mapadalagan kan cooperativa dakulang desvantaji sa mga sadit na consumedores nin corriente sa mga hararayo nang barangay.

        Kun lugi sa sarong lugar pueding putolon an servicio nin corriente asin an solucion pa mapalangkaw nin singil sa tarifa maseguro sana na dai malulugi an cooperativa.

        Sa lado ni Board President Ramon Borja, sinabi kaini na mayo man nin problema kun adalan an situacion kan cooperativa kan Castalla huli ta makakatabang pa ngani sinda sagcod na maghaman nin recomendacion nganing mapatalubo an nasa Category E nang Casureco II.