An Ina asin Ama kan saimong Nanay asin Tatay iyo an saimong Lola asin Lolo maski bako sindang kasal sa langit magkataid sanang nakahigda sa banig!

        Sa sarong pagtaram sinda an saindong grandparents na tatawan nin honra sa maabot na Domingo, Setyembre 10: Kaaldawan kan grandparents’ day!

        Maski si Lola asin si Lolo mayo nin maitataong pamana kaipuhan na igalang asin mahalon kan mga makuapo nin huli na sana sa mahal na buhay na itinao sa saindang mga magurang!

        Lola, Lolo mabuhay kamo!

        -oOo-

        Kun siisay man an nagsabi na an babae iyo an inaapod “weaker sex” garo napasala sa saiyang ginibong research.

        Sa totoo lang, kun kusog nin boot asin baskog nin tuhod an pag-uurolayan, medyo lamang an mga kababaihan sa mga kalalakihan.

        Por ejemplo:

        Sa ngaran nin pagtaram sa mikropono sa atubangan nin dakul na tawo kaipuhan kan ibang lalaki na mag-inom na nguna nin limang litrong marka demonyo. Alagad sa babae an arak dai na kaipuhan tanganing makataram sa atubangan kan kadaklan ta sa harong ngani yamyam sanang yamyam!

        Manunungod sa pagsunod kan mga katukduan ni Hesus, mas makusog an pagtubod kan mga aki ni Eva kaysa mga aki ni Adan. Sa totoo kaiyan, kada Domingo mga babae an nakakapano kan simbahan ta babae sana an igwang kalag na inaataman. An mga kalalakihan yaon sa bulangan!

        Sa sugot ni Satanas makusog an resistensya kan mga kababaihan kaysa kalalakihan. Pruweba kaiyan, sa numero mas dakul na lalaki an igwa nin other woman kaysa babae na igwa nin kasaruan kaiba na an DI na ataman!

        An babae dai natatakot maski sa kada pag-aki baakon an tulak. Alagad an lalaki simple sanang operasyon sa ano man na parte kan hawak garo na matigbak!

        Nin huli ta kulang an bisyo, mas halawig an buhay kan babae kaysa lalaki. Sabihon pa, dakul na babae an nakakaduwa sagkod na nakakatulong agom ta lalaki madaling madidbol!

        Sa mga barangay dakul an mga nanay na mamundo sa pagsulo-sulo ta si Tatay tuninong nang haloy sa Kamp Santo!

        Sa Lions, sa Rotary, sagkod sa K of C, haros bulan bulan igwa nin necrological services para sa mga miyembros na nagtalikod na sa mundo. An nabayaan iyo an magagayon, mahahamot, asin higot pa an limugmugan na mga balo!

        Sa apod kan kamundohan iba an pagmati kan lalaki sa babae: an ‘laki garo bombilya: madaling palaadon, madali man na palsukon; an ‘baye garo plantsa: haloy nang nakasaksak, malipot pa; haloy nang ginabot, mainit!

        Maski sa ngaran nin romansa mas mabaskug an tuhod asin halawig an resistensya kan mga aki ni Eva.

        Helinga na sana si Lolo. Kun naglalakaw nagpipiling-piling na an payo. Garo man lang nagsasabing “Habo na ako”

        Alagad helingon si Lola. Kun naglalakaw nagtatatango pa. Garo man lang nagsasabi: “Gusto ko pa”!

        Happy grandparents’ day!