AN Commission on Election nakatalaan na mag-implementar nin pag-okag nin mga election officer (EO) sa Camarines Sur asin Camarines Norte na ipapasunod ano man na semana pighahalat nalang an directiva gikan sa personnel department.

        Sa Camarines Sur 23 na mga EO asin 10 sa Camarines Norte, kabali na si Provincial Election Supervisor Abogado Noriel Badiola kan Camarines Sur na madedestino sa Sorsogon.

        Si Alex Marpuri oficial na parapahayag kan Comelec Camarines Sur nagsabi na bako man huli kan dayupot na sa mga politico an mga EO kaya babalasahon envez ini base sa Acta Republica 8189 na kun an oficial kan Comelec may apat nang taon na destino sa sarong municipio kinakaipuhan nang ibalyo sa ibang distrito bako sa kataid na municipio.

        An saro pa sa dahilan kan pagbalasa nin mga EO kun may candidato na pinsan o harani sa saiyang familia, ini dapat ipasunod susog sa seccion 56 kan Omnibus Election Code, sabi pa ni Marpuri.

        An Camarines Norte na may doceng banwaan alagad an sampulong EO, hagop na kan RA 8189 dai man ikabalyo sa laog kan kaparejong provincia huli ta saro sanang distrito asin an mangyayari kaini madedestino digdi sa Camarines Sur mientras na dai man pueding ibalyo sa kataid na provincia kan Quezon.

        Sa pagbalyo ki Badiola sa provincia nin Sorsogon, ini mangyayari huli ta an item digdi sa Camarines Sur para ki Abogado Romeo Fortes na ngonian temporariong nakadestino sa sinambit na provincia.

        Si Fortes, nagpa-destino muna sa saiyang provincia huli ta bako pang panahon nin eleccion asin ngonian ibabalik na siya digdi pighahalat nalang an directiva hali sa Comelec central office.

        Mientras tanto, an Comelec Camarines Sur nakatalaan na magbilog kan Task Force Operation Baklas nganing taranggalon an mga ilegal na poster na dawa sain pigpadukot o luwas na sa designadong common poster area.

        An DILG nagpaluwas nin Memorandum Circular No. 2007-05 na pirmado ni Secretary Ronaldo V. Puno na nag-deputized sa mga oficiales de barangay asin barangay tanod sa gabos na municipios asin ciudades, sa pagbaklas kan mga illegal campaign materials.

        An mga oficina local kan DILG iyo an natukahan na mag-implementar kan sinambit na Memo-Circular matapos magpaluwas nin Comelec en banc resolution No. 7823 nganing estrictong i-implementar an “Fair Election Act”.