An Department of Education (DepEd) Bicol pig-etsafuera ni Secretary Jesli Lapus sa basang na pagbalasa sa puesto ki City School Division Supt. Ruby Abundabar kan Ciudad nin Naga nganing ribayan ni City School Division Supt. Evangeline Palencia kan Ciudad nin Iriga, an nasa likod iyo an sarong politico na harani sa Malacañang.

        “Sa normal na situacion an regional director iyo an na-recomendar kan pagpahali o pag-okag nin mga School Division Supt. alagad ngonian na panahon nin eleccion dai ini nasunod”. Ini an mga pahayag ni regional director Celedonio Layon, Jr. kan DepEd Bicol kan maconduciran nin entrevista kasuodma kan Bicol Mail sa paagi nin telepono.

        Sinabi ni Layon igwa nang memorandum order si Lapus petsado Abril 11, na magribayan nin destino sinda Palencia asin Abundabar, naging padatulan na dahilan nganing magka-igwa sinda nin bagong lugar na iba an pueding mamatian na trabajo apesar na panahon man ngani nin vacacion.

        “Nasurprisa ako kan orden ta mayo nganing ano man na recomendacion asin ini an pinaka-enot na record sa DepEd Bicol kan basang na paghali kan sarong oficial kan DepEd. “ sabi pa ni Layon.

        Si Congresista Luis R. Villafuerte na harani sa Malacañang iyo an pigtutubodan na nasa likod kaini, alagad an oficial kan DepEd Bicol dai naman nagconfirmar kan informacion

        Sinda Layon asin Lapusnagkaolay sa isyung ini sa paagi nin telepono. An sabi kan secretary kun dai nag-agi sa proceso an pagbalasa sa oficial kan DepEd dapat ma-intindihan siya ta panahon nin eleccion.

        Naghagad na nin exemption si Lapus ki Chairman Benjamin Abalos kan Commission on Election sa pag-implementar kan saiyang memorandum huli ta mabalga sa codego de eleccion an pagribay mientras na hagop na kan election ban.

        Sagcod kasuodma an oficina kan DepEd Bicol dai pa nakakarecibe nin formal na comunicacion kun inaprovan na ni Abalos an sinambit na kahagadan. Duda an City School Division kan Ciudad nin Naga sa biglaan na pagbalyo ki Abundabar na may motivo pam-politica. Si Abundabar, saro sa tulong miembro kan City Board of Canvasser sa maabot na eleccion sa Mayo 14 asin kaibahan niya si City Prosecutor Romeo Tayo asin si Election Officer Abogado Maico Julia, Jr. na iyo an chairman.

        Nag-rereclamo an nagkaperang mga paratukdo kan public school sa Naga huli ta piglaogan naman nin politica an saindang agencia, alagad piglinaw ni Layon na kun aprovado na kan Comelec an pagpahali ki Abundabar ini saiyang iimplementar nganing dai sya makasohan nin insubordination.

        Kun nasurprisa siya kan orden maging an DepEd kan Ciudad nin Naga “prerogative” man giraray iyan kan Secretary, segun sa director kan DepEd Bicol.