Ano man na aldaw ngonian na semana liwat mabubuhay an centralisadong operacion kan ilegal na sugal na jueteng sa Camarines Sur, alagad bigla man na nag-vacacion sa oficina si Bicol PNP Chief Supt. Ricardo Padilla sa dai ma-araman na dahilan asin makakabuelo na an sugal mientras na kaipuhan kan mga poderosong politico an payola sa jueteng na gagamiton na campaign fund ngonian na eleccion.
Si Padilla iyo si naka-pundo kan sugal na jueteng sa Camarines Sur huli ta dai kaya ni Camarines Sur PNP Provincial Director Sr. Supt. Romeo Mapalo, apesar kan directiva ni Gobernador L-Ray Villafuerte na puhoon an sinambit na sugal.
Nagtutukaw na OIC regional director kan PNP Bicol iyo si Sr. Supt. Balligi Agnanayon B. Tira na nag-asumir sa puesto kan Abirl 16, 2007. Si Padilla enot nang pig-provaran na ribayan sa puesto kan ika-tulong semana kan bulan nin Marzo asin an saiyang ginibo kan maaraman na hahalion siya si mga pagugoan kan sugal na jueteng sa Camarines Sur an saiyang pigpadarakop sagcod na dagos nang napundo.
An sunod na target na riribayan iyo si OIC Chief of Police P/Supt. Benjamin Suratos kan Naga City Police. Sa regular na miting kan Peace and Order Council kan City Hall si Suratos nagsabi na dai niya pa narerecibe an orden kun nuarin siya hahalion.
Napag-araman na pighahalat sana an pag-aprovar kan Commission on Election huli ta hagop kan election ban an pag-okag nin mga oficial kan PNP asin ini mangyayari sana kun nag-agi sa oficina kan Comelec.
An pagribay nin bagong mga pamayo kan PNP saro sa pigpapasunod kan Camp Crame na mayong magiginibo si Padilla dawa na ngani kan Deciembre 29, 2006 sana siya na-destino sa PNP Bicol huli ta igwa nang bendicion an mga halangkaw na oficial kan PNP asin nasa administracion na ipadagos an operacion kan centralisadong ilegal na sugal na jueteng.
Sa mga entrevista ki Mapalo an saiyang reaccion kun nagpapadagos an jueteng ini haloy nang panahon maging kan bako pa siya an provincial director alagad kun gustong matunaw an sugal nangyayari mala ngani na-gadan sa Camarines Sur kan mag-orden si Padilla na sakyadahon an mga pagugoan kan sugal.
Si Mapalo hinagad ni Gob. L-Ray Villafuerte ki PNP Chief Oscar Calderon na ribayan ni P/Sr. Supt. Romeo Tumangi, si Mapalo alagad pendiente pa sa oficina ni Comelec Chairman Benjamin Abalos matapos iindorsar ni Calderon kan Abril 10, 2007.
Nag-aandam na an mga capitalista asin ribasador sa lugar kan mga gugoan kaini sa Libmanan, Del Gallego, Pasacao, Camaligan, Pili, Bato, Buhi, San Jose, Goa asin iba pang lugar sa laog kan Camarines Sur.
