PILI, Camarines Sur - Nagbalik na si Abogado Romeo Fortes komo Provincial Election Supervisor (PES) sa Camarines Sur kan Martes hali sa saiyang temporariong destino sa Sorsogon, alagad posibleng madestino siya sa Masbate, oras na halion sa sinambit na provincia si PES Abogado Armand Ricarte Jr.

        Kun iimplementar na madestino si Fortes sa Masbate si Abogado Maico Julia Jr. Election Officer kan Ciudad nin Naga iyo an matukaw na acting PES kan Camarines Sur mientras dai pa maaraman kun siisay man an matukaw na karibay niya sa Naga.

        An binayaan na puesto ni Fortes sa Sorsogon, nagribay si Abogado Noriel Badiola na hali digdi sa Camarines Sur.

        Mientras tanto, si director Zacarias Zaragosa kan Comelec Bicol nagsabi na an saindang oficina central iyo an mapaluwas nin resolucion kun ipapasa-irarum sa Comelec control an maribok na provincia kan Masbate.

        Saiyang pig-confirmar na an Bicol PNP asin an prelatura kan Masbate an nag-recomendar na dapat itao na sa control kan Comelec an provinciang ini huli kan sunod-sunod na mga garadanan na may relacion sa eleccion.

        Kabali na sa mga victima iyo an nagkaperang mga miembros kan PNP asin dai pa kabali sa numero si mga incidente nin encuentro entre kan militar asin tropa kan rebeldeng NPA.

        Si Obispo Joel Bailon an nagsurat ki Comelec Chairman Benjamin Abalos na dapat ribayan naman si Atty. Armand Ricarte Jr. bilang PES nganing maibitiran an ano man na mga pagduda na igwa siyang pig-papaboran nin mga candidato sa maabot na eleccion.

        Si Chief Supt. Ricardo Padilla, antes nahali bilang Bicol PNP Chief nag-recomendar na ki Abalos na dapat itao na sa Comelec control an sinambit na maribok na provincia huli kan sunod-sunod na mga garadanan na may relacion sa eleccion.

        Alagad si Zaragosa nagtutubod na kun kan mga nakaaging eleccion pigdeclara sa Comelec Control an Masbate, ini pueding aprovaran kan saindang oficina central huli ta padagos na naglalangkaw an mga caso na may relacion sa eleccion.