AN National Bureau of Investigation (NBI) Bicol nakatutok ngonian an saindang prioridad sa investigacion sa dai na-reresolveran na mga extra juidical killing afuera kan mga pendienteng caso na padagos pa an pagsiasat.
An NBI central office nagpaluwas nin directiva na huli ta an rehiyon Bicol saro sa may halabang listahan kan mga caso sa political killing kabali sa saindang mission ngonian iyo an pag-investigar sa sinambit na mga caso.
Alagad sinabi ni NBI Deputy Director Manny Eduarte an saindang kaipuhan sa ngonian iyo an cooperacion kan mga familia kan victima nganing makatabang sa pagresolver kan mga caso. An problema ta sagcod sa ngonian mayo pang oficial na mga reclamo na iyo an papasikadan kan saindang pagsiasat kun siisay an posibleng mga responsable sa crimen.
An mga militante sa Bicol sa saindang pigtiripon na listahan kan mga victima na maabot na sa 120 an caso.
An NBI Bicol igwa nang bagong regional director sa pamamayo ni Abogado Manuel Almendaris matapos tuwadan an oficina ni ni dating Director Carlos Saunar na nag-aatubang nin caso sa Presidential Anti Graft Commission.
Sa enot na mga pahayag sa prensa ni Almendaris, sinabi kaini na kabali pa sa saiyang tatawan nin atencion iyo an campania laban sa ilegal na droga na saro sa pigmaigotan kan panahon ni Abogado Ricardo Diaz sa halipot na panahon niya digdi sa Bicol.
Si Jariz Bida kan Bayan Muna Camarines Sur nagpahayag na naglalaom sinda na matrabajo an NBI bakong arog kan PNP na sagcod sana sa mga press statement mayong na-investigaran na caso sa political killing.
Kan Julio 2006 an Camarines Sur Movement for Civil Liberties (CSNCL) nagdulok na sa NBI Bicol kan panahon ni Diaz, alagad dai na-accionan mientras na bigla siyang hinali huli sa paki-aram nin poderosong politico sa provincia.
Haloy na sinda naghahagad nin justicia sa mga victima kan extra judicial killing puros lista sa dahon nagpaparalangkaw an mga caso mala ngani sa ngonian maabot na sa 40ng mga victima. Ini sa Camarines Sur sana dai pa kabali an hali sa lima pang provincias kan Kabikolan.
Kan panahon ni Provincial Director P/Sr. Supt. Romeo Mapalo, ini nagpaluwas nin directiva sa mga jepatura de policia na mag-conducir nin investigacion sa mga caso sa political killing. Nagretiro nalang an dating PD mayo man nahelingan nin resulta kan investigacion sa dakul na mga caso.
Kabali sa mga victima si Reimon Guran, lider kan LFS sa Bulan, Sorsogon, Alice Claver, coordinator kan Bayan Muna; asin dakul pang iba hali sa mga provincias kan Kabikolan na igwa nang record na 120ng caso.
An NBI Bicol naghahalat man kan lider militante nganing magtabang sa pag-sangat nin reclamo sa saindang agencia asin madara an familia kan victima nganing ponan an proceso kan investigacion, alagad sa ngonian mayo pang oficial na reclamo.
An militante pig-aacusaran ninda sa mga extra-judicial killing iyo an militar alagad ini pigpapahimotikan envez pig-tutukdo na rebeldeng NPA an kag-gibo kan crimen.
