AN premir distrito kan Camarines Sur iyo an magiging centro kan Economic Zone kan provincia mientras na namumugtak na ini sa Del Gallego, Camarines Sur na may hiwas nin 750ng hectaria.
An Sanggunian Panlalawigan sa ginibong session regular kan Martes na hapon pigpasar an sarong resolucion na naghahagad sa Philippine Economic Zone Authority (PEZA) na ma-registro an Camarines Sur na maging Economic Zone an premir distrito nganing magka-igwa digdi nin sadiring industria na enot nang pighace kan taon 1995 kan panahon ni dating gobernador asin ngonian Congresista Luis R. Villafuerte kan segundo distrito kan Camarines Sur.
Si Vocal Romulo Hernandez kan premir distrito kan Camarines Sur iyo an nagpadreno kan resolucion na pigsuportaran kan gabos na miembros kan sanggunian huli ta saro ini sa pangiturogan ni Gobernador L-Ray Villafuerte.
An 100 sa 750ng hectaria kan Economic Zone pigtagama para sa hog farm na ma-invitar nin privadong investor na magbugtak kan saindang negocio.
Si Vocal Angel Naval kan segundo distrito kan Camarines Sur nagsabi na an Capitolyo Provincial iyo an mabugtak kan mga facilidades nganing iyo man an gamiton kan malaog na mga negociantes.
Nagtutubod an vocal kan premir distrito na marerealisar na an proyecto kan presenting administracion kan Capitolyo Provincial matapos magpalyar ini kan panahon ni Congresista Villafuete kan siya pa an jefe ejecutivo kan gobierno provincial. Suportado pa ini kaidto ni dating Congresista Rolando Andaya, Jr. na ngonian DBM Secretary alagad dai natutokan an proyecto.
Si alcalde Bayani Veluz kan Del Gallego, nagpahayag nin kaogmahan huli ta dakulang tabang sa lado nin economia sa saindang banwaan envez kan pangiturogan ni CongresistaFelix Alfelor Jr. na gibohon na dump site nin basura hali sa Metro Manila an saindang banwaan.
Mawot pang ipadagos ni Alfelor na maging dump site an Del Gallego sa rason na ma-ingreso an provincia nin sagcod sa 500 milyones pesos hali sa basura.
An simbag ni Veluz an dapat gibohon kan congresista darahon na sana sa saiyang sakop na distrito kan Rinconada area kun gusto niyang mag-yaman sa basura.
An Sanggunian Bayan haloy nang nagpasar nin resolucion na nag-cocontra kan plano ni Alfelor asin ngonian mas prioridad na tarabarangan kan mga oficiales kan provincia iyo na mangyari na an haloy nang pangiturogan na economic zone.
