NA-AALARMA an local na gobierno kan Bombon, Camarines Sur sa marikas na paglangkaw kan caso nin diarrhea poon sana kan Julio 30 na naglakop na sa pito kan walong mga barangay asin igwa nang 200 na paciente an record kan Municipal Health Office (MHO), pig-iinum na tubig hali sa water works kan banwaan iyo an causa kan helang.
Sa entrevista kan Bicol Mail ki alcalde Ma. Luisa Angeles, sinabi kaini igwa na sindang ginibong accion sagcod na pighagad na an tabang kan Provincial Health Office (PHO), alagad mayo pa sindang plano na mag-declara nin diarhea outbreak huli ta pighahalat pa an bacterial analysis kan water sample na hali sa Bombon Rural Waterwork Association (BRUWASA) na iyo an pigdudahan ni Municipal Health Officer Dra. Beatriz Wong na iyo an causa kan mga obra suka mga residentes kan pitong barangay.
Nagbungkaras an helang sa barangay Sto. Domingo asin nagsunod an pagtaraid na mga barangay na pig-report kan Viernes (Agosto 3) may 70 pa sanang caso. Kan Lunes igwa nang 150 asin kasuodmang Miercules sobra na sa 200 na paciente dai pa kabali digdi si pigdalagan sa privadong hospital sa Ciudad nin Naga asin nagbulong na sana sa saindang residencia.
Kadakli kan mga paciente pigdalagan sa Bicol Medical Center asin sa MHO office kan local na gobierno.
Si Consejal Tito Garcillanosa, chairman kan Committee on Health kan Sanggunian Bayan sa pagsahot na sa entrevista kan Bicol Mail sinabi kaini na an causa kan diarrhea cases sa saindang banwaan iyo an na-inum na tubig hali sa BRUWASA. Ini base sa mga pahayag ni Dra. Wong kan maging visita sa session regular kan sanggunian sa pagtubod kan MHO na 80 por ciento an ginikanan iyo an posibleng maating tubig na na-inum hali sa water system kan Bombon tanganing maseguro kun sain talaga nag-gikan an helang nagkoa nin water sample kan BRUWASA asin pigpa-examin na sa laboratorio kan PHO na ipapaluwas an resulta kan bacterial analysis ngonian na aldaw.
An manijamiento kan BRUWASA sa pamamayo ni OIC Manager Elsa Juliado nagtutubod dai man contaminado an tubig kan saindang waterworks na iyo pigsahotan causa kan marikas na paglakop kan diarrhea.
Alagad an PHO huli kan report na hali sa tubig an dahilan kan sinambit na helang nakatalaan na mag-inspection kan mga tubo kan BRUWASA kaibahan an mga personajes kan local na waterworks.
Mientras tanto, sinabi pa ni Consejal Garcillanosa an Sanggunian Bayan nagpasar na nin resolucion sa pagpaluwas nin 50 mil pesos nganing gamiton sa pagbakal nin mga medicina nganing magkulpa an paglakop kan sinambit na helang.
