MILYONES na mga Pinoy an nagdadalan kan ganahon ni Allen Paul Aguada an ikaduwang halangkaw na premyong P2 Milyon sa Deal or no Deal ni Kris Aquino Lunes na banggi.

        Duwa na sana an numero na natatada sa brief case: P2 Milyon asin P3 Milyon; asin igwa na si banker nin offer na P2,250,000 kan mag- “no deal” pa si Allen.

        Kan bukasan an napiling brief case ni Allen, P2 Milyon an laog. An yaon sa luwas na brief case, P3 Milyon!

        Nagin multi-milyonario si Allen, sarong Filam na nagbisita hali sa Chicago, ta nanggana nin P2 Milyon.

        Bako man kita an nanggana alagad maogma an gabos ta igwang nanggana nin milyones. Arug daw kaiyan kadali an panggana sa mga popular na game and talent show ngunyan.

        Digdi sa Siyudad nin Naga, Deal or no Deal, dakul na mga jovenes an nagtatalubo na magin multi-milyonario sa masunod na mga aldaw.

        Enot si Allan Cu, pinakamatua sa pitong aki kan mayaman na Tsinoy na si Totoy Cu, na presidente na kan negosyo kan pamilya na G7 Holdings Corporation.

        Si Totoy Cu pa man giraray an chairman of the board kan korporasyon nin mga banko, kan sikat na Avenue Square sa Magsaysay, an mabukas na dakulang hotel na Avenue Plaza, mga restaurant asin iba pang matalubong negosyo sa Naga. Alagad si Allan iyo na an yaon sa frontline.

        Saro pa sa magigin multi-milyonaryo sa maabot na ikaduwang henerasyon kan mga Tsinoy sa Naga, deal or no deal, iyo si Toto Tan, an saro sa mga aki kan super-rich na si Romy Tan, kagsadiri kan dakulang mga negosyo sa Naga siring kan pa-arkilahan na mga pwesto-komersyal, restaurant-hotel, mga negosyo poon sa pagkakan sagkod sa kagamitan.

        An saro pang joven na nagtatalubo na magin multi-milyonaryo sa maabot na aldaw iyo si Mark Dennison Enrile, an iyo-iyong aki ninda Tommy asin Onti Enrile na kagsadiri kan pamosong Starmark Cafe and Diner asin Starmark Royale, asin iba pang arkiladong pwesto-komersyal kan mga negosyo sa Naga.

        Sa laog nin sobra sa beynte anyos, si Tommy asin si Onti yaon sa construction industry. Alagad binutasan ta an nagyaman sana iyo an mga kuraptong opisyales nin gobyerno sa DPWH.

        Si Romy Tan asin si Tommy Enrile palan iyo an kagsadiri kan daga sa CBD II na arkilado kan SM Mall sa laog nin sinkwenta anyos!

        Deal or no Deal an magigin mga multi-milyonario sa masunod na henerasyon kan mga Tsinoy sa Siyudad nin Naga maghahali sa pamilya ninda Abogado William Enrile, Aquiles Lo, Pascual Dy, Eugene Ong, Maricel Uy-Olivan, asin Aping Olivan.

        An sekreto kan padagos na pagtalubo kan negosyo ninda Romy Tan, Totoy Cu asin Tommy Enrile iyo an saindang higos asin tiyaga. Saro pa, an gabos na padre de familia mayo nin bisyo.

        Si Romy, Totoy, asin Tommy dai nin bisyo sa magayon na babae, sa maogmang sugal, asin managom na arak. An hapot: maogma daw sinda?