SARO sana an candidatong congresista kan oposicion sa segundo distrito kan Camarines Sur nganing iyo an isabat ki Congresista Luis Villafuerte kan Kabalikat ng Malayang Pilipino (KAMPI) asin an formal na pag-anunciar gigibohon sa masunod na semana.

        “I can easily promise you na saro sanang candidato sa grupo kan oposicion contra sa nakatukaw na diputado. In principle uyon na kami ni Abogado Joel Anselmo Cadiz na saro sana an malaban”. Ini an pinakahuring pahayag sa prensa kasuodma ni dating Congresista Sulpicio “Cho” Roco, Jr. mientras na liwat sindang mag-oorolay ni Cadiz.

        Sinda Roco asin Cadiz parejong asperanteng congresista, alagad nag-oorolay kun siisay an dapat magpahunod sa sainda.

        Nagpahimotik man si Cadiz na nagsibog na siya kan ambicion sa congressional election. An saindang negosacion iyo an matapos kan mga especulacion na sinda masabayan sa pagcandidato contra ki Villafuerte.

        Sinabi ni Roco na completo pa an saiyang mga lider sa cada municipio sagcod sa mga barangay. Igwang mga incumbent na alcalde mala ngani pati na si ibang mga candidatong alcalde sa campo ni Gobernador LRay Villafuerte an masuporta sa saiyang candidatura.

        Tanganing ipaheling na sinda nagkasundo an formal na pag-anuncar sinda mismo ni Cadiz asin alcalde Jesse Robredo an masarabay na mag-atubang sa publico, sabi pa kan dating congresista.

        An arin sa sainda na maging oficial na candidato kan oposicion iyo an susuportaran ni Robredo, alagad an patanid kan alcalde kun magkaka-igwa pa nin third force mayo na lugod na susuportaran arin man sa duwa.

        An maribansang congresista kun iyo an maging candidato an nagbuyagyag na nagkaperang mga isyu an saiyang iluluwas contra ki Villafuerte bako lang sa propuestong charter change.

        Mientras tanto, afuera kan laban sa segundo distrito an pigkakasibotan niya sa ngonian iyo an candidatura ni Sonia Roco sa kargong senador sa ticket kan United oposition.