Pili, Camarines Sur - An CPP/NPA/NDF kaipuhan makapagana nin 12ng party list sa Camara-Baja tanganing mapakusog liwat an saindang fuersa sa paagi nin pagbakal nin dagdag na mga armas asin computer.
Limang party list an pig-bulgar na kan militar sa paagi kan saindang mga nasamsam na documentos gikan sa CPP/NPA/NDF na susuportahan sa maabot na eleccion sa Mayo 14, 2007. Ini kinababalihan kan Bayan Muna, Anakpawis, Gabriela, New Kabataan dating Anakbayan asin an Suara. Sinda pig-aakusaran kan militar na front kan mga rebelde.
Si Brig. General Nestor Sadiarin, commanding officer kan 902nd kan Philippine Army na may base sa Tulay-na-Lupa, Labo, Camarines Norte asin saiyang sakop sa area of responsibility an Camarines Sur naging visita sa session regular kan Martes sa Sanggunian Panlalawigan sagcod na saiyang pigsaysay an mga plano kan sinambit na movimiento para sa maabot na eleccion.
Saindang target an 450,000 asta 500,000 na votantes nganing maseguro na manggagana an saindang suportadong progressive party list mientras na makikipag aliansa sa manlaen-laen na sectores asin igwa nin sadiring Abogado na yaon man sana sa ciudad.
An saindang mga agenda segun ki Sadiarin iyo na manggana an mga party list na saindang suportado, paghagad nin pambakal nin armas kabali na an paghagad sa mga mang-gaganang party list representative nin proyecto sa infrastractura kabali na an pag-colecta nin “SOP”.
Ngonian na panahon nin eleccion ma-imponer nin permit to campaign (PTC) sa mga candidato. Huli kaini, an oficial kan militar na-ngapodan sa mga miembros kan junta provincial na dai magbayad kan PTC.
Alagad an Philippine Army mayo man nin aseguracion sa mga candidato na dai mabayad nin PTC, kun ini saindang matatawan nin seguridad sa pagcampania sa mga banwaan asin barangay.
An pag-singil asin pag-colecta pueding paagihon sa text messages asin surat na ipapadara sa mga candidato. An informacion kan militar nagpapahayag na sa mga candidatong gobernador asin congresista mabayad sa PTC nin cantidad 300,000 asta sa 500,000 pesos, sa mga candidatong alcalde 100,000 asta 300,000 pesos mientras na igwa pang suhay na tarifa sa iba pang mga candidato local asin senador.
Igwa nang listahan an militar na pigsisingil na kan NPA kan saindang utang sa PTC kan eleccion kan 2001 asin 2004. Aram na ninda an mga pangaran, alagad dai pa man pigbuyagyag.
