PILI, Camarines Sur – Bako nang imposible an haloy nang kahurotan na ibalyo an mga regional office (RO) sa ciudad nin Naga asin maging sa iba pang lugar kan Camarines Sur, igwa nang mga regional director an nagpasabot na interesado na maghubo kan saindang oficina digdi sa Camarines Sur nganing makaibitar sa ano man na pag-alburoto kan Volcan Mayon siring kan nangyaring mudflow kan bagyong “Reming” na maabot sa on mil an mga binawian nin buhay kabali na si mga nagkakawarara.
Pigkonfirmar ni bise gobernador Salvio Fortuno sa Bicol Mail na nagkapera nang mga director kan manlaen-laen na agencia an nagpasabot sa saiya na interesado na magbalyo digdi sa Camarines Sur efecto kan nangyaring calamidad sa Albay.
Igwa nang propuestong resolucion si Fortuno sa Sanggunian Panlalawigan kan Camarines Sur nganing huroton ki Presidente Gloria Macapagal-Arroyo na accionan an kahagadan kan mga director, alagad dai pa man muna pig-mentionar an mga agencias de gobierno.
An propuestong resolucion nakasunad na sa Committee on Laws ni Vocal Angel Naval na matalaan nin committee hearing sa mga masunod na semana.
Naheheling kan bise gobernador an dakulang suporta sa resolucion mientras na si Gobernador L-Ray Villafuerte iyo an chairman kan Regional Development Council (RDC) sa Bicol asin dayupot pa ki Presidente Arroyo.
An propuestong resolucion ni Fortuno nagtugma man sa mga enot na pahayag ni House Appropriation Chairman Joey Salceda kan tercer distrito kan Albay na pabor siya na ibalyo an mga oficina regional sa Camarines Sur nganing makalikay sa destroso kun natuga an vulcan.
An pahayag ni Salceda ginibo sa press conference kan Marzo 19, 2006 matapos maging juespe de honor siya sa graduation ceremony sa colegio kan University of Nuva Caceres sa Ciudad nin Naga.
Afuera pa kaini, limang taon na an nakakaagi an Sanggunian Panlungsod kan Ciudad nin Naga nagpasar na nin resolucion na pigpadrenohan ni Consejal Esteban Abonal na dapat ibalyo na an mga oficina regional sa Naga asin Camarines Sur huli kan paghadit sa mga pagtuga kan Mayon sagcod na na-aafectaran an mga transaccion sa mga oficina regional.
Kan trangkilo an Volcan Mayon an Sanggunian Panlalawigan kan Albay nagpasar nin resolucion na kaipuhan ibalyo an mga oficina regional kan Department of Agriculture asin Bureau of Fisheries and Aquatic Resources (BFAR) sa Rawis, Ciudad nin Legaspi hali sa Pili, Cam. Sur huli ta yaon digdi an Government Regional Center (CRC) kan Bicol.
Saindang pigbasehan an Presidential Proclamation No. 1676 petsado Octubre 8, 1977 na pigdeclara ni dipuntong dictador Ferdinand E. Marcos na regional center kan Bicol an Ciudad nin Legaspi.
Nagbabarangaan na an LGU Camarines Sur, Ciudad nin Naga contra sa LGU kan Albay. Kan Enero 13, 2006 an City Hall kan Ciudad nin Naga nagpasar nin resolucion contra sa kahagadan kan Albay ki PGMA na ibalyo an mga oficina regional kan DA asin BFAR sa Rawis, Ciudad nin Legaspi. Pigsunodan man ini nin kaparejong resolucion kan Sanggunian Panlalawigan kan Camarines Sur kan Febrero 14, 2006.
Mientras tanto, naglaog naman an City Hall kan Ciudad nin Iriga, pig—oopresir na ni Alcalde Madel Alfelor-Gazmen sa mga oficina regional kan DTI asin DILG sa Ciudad nin Legaspi na maghubo na kan saindang oficina sa Iriga huli ta andam sinda na magtao nin libreng lote para sa papatindogan na edificio.
