AN pagtapsok na ni Presidente Gloria Macapagal-Arroyo sa dingkilan sa politica kan mag-amang Villafuerte sa Camarines Sur iyo an pueding magresolver kun bubugtakan kan KAMPI nin kalaban sa eleccion local si Gobernador L-Ray Villafuerte.
Si alcalde Mel Gaite kan Baao, Camarines Sur sa entrevista kan Bicol Mail kasuodmang aga sa paagi nin cellphone nagconfirmar na sa manifesto kan mga alcalde na miembros kan KAMPI siya na an pigtulod na candidatong gobernador contra ki Gob. Villafuerte (Lakas-CMD).
Ngonian na semana posibleng ipaapod na ni Presidente Arroyo an joven na gobernador nganing resolveran an padagos na pagbugtak niya nin mga candidatong alcalde contra sa mga candidatong alcalde kan KAMPI na an national chairman iyo an saiyang ama congresista Luis R. Villafuerte.
Kan hapoton kan BM si Gaite kun dai na magtugot si L-Ray sa ano man na areglo kun siya mapadagos sa pagcandidatong gobernador mayo pa siyang directang kasimbagan.
Sa tiripon kan mga alcalde na miembros kan KAMPI sa Manila kan Domingo (Enero 14) sinda Gaite asin alcalde Elmo Bombase kan Tigaon, Camarines Sur na iyo an pigpipilian na maging candidatong gobernador alagad sa kinahamanan kan manifesto si Gaite iyo an pigsuportaran na paglaban sa gobernador asin si Bombase sa cargong bise gobernador.
Enot nang nagka-igwa nin miting an mga alcalde na miembros kan KAMPI sa Regency Hotel sa Ciudad nin Naga kan nakaaging semana asin sinda Bombase asin Gaite iyo an pig-indorsar na pagpilian na candidatong gobernador na nagkaigwa nin final na orolay kan mga lideres kan politico sa Camarines Sur na ginibo kan Enero 14, 2007 sa Manila sa atubangan ninda Congresista Luis Villafuerte, DBM Secretary Rolando Andaya, Jr., congresista Nancing Alfelor asin presidential son Diosdado “Dato” Arroyo.
Sa sinambit na harampangan an alcalde kan Baao an pigkasurondoan na isabat na candidatong gobernador contra sa aki ni Congresista Villafuerte. Alagad dawa na ngani siya an pigsuportaran, sinabi kaini na “status” pa an kamugtakan kaya ngani habo pa siyang magconfirmar na dagos an saiyang candidatura.
An ibang mga alcalde na nakaolay kan BM na habo nang magpasambit kan saindang pangaran nagsabi na posibleng dagos na an banggaan sa politica kan mag-ama huli ta haros igwa na nin mga kanya-kanyang completong mga candidato sa mga banwaan na mayo nang plano mag-sibog kan saindang ambicion sa politica.
Nagdecicion an mga alcalde na magbugtak nin candidatong gobernador contra sa joven na Villafuerte huli ta dai nagsunod sa unity ticket na pigkasundoan ninda Cong. Villafuerte, Andaya asin Alfelor.
