SI NBI Director Carlos Saunar na controvercial sa ngonian huli kan isyu na prioridad niya an pagtanum nin mga pechay nagsabi sa Bicol Mail na preparado siyang maghali sa oficina ano man na oras kun iyo an kamawotan kan Sanggunian Panlalawigan kan Camarines Sur.
Photo Caption: Nahehelingan sa atubangan kan oficina rehiyonal kan NBI Bicol sa Ciudad nin Naga an mga tanum na pechay nganing magka-igwa an agencia nin sadiring producto nin gugulayon. Alagad binawi na ni Director Carlos Saunar na ini an saiyang prioridad envez “joke only”. Mga confidential na plano kan NBI dai dapat ibulgar sa publico kaya pig-alegar an pagtanum pechay.
Reaccion ini ni Saunar sa mga pahayag ni Vocal Rex Oliva sa media na magpadreno nin resolucion nganing huroton ki NBI Director Nestor Mantarin an palayason siya digdi sa Bicol huli kan kawaran nin mga programa ngonian na taon sa sinambit na agencia asin sa pahayag sa prensa kan director rehiyonal na prioridad niya ngonian na taon 2007 iyo an pagpatanum nin mga pechay sa natad kan oficina rehiyonal kan NBI.
Si Saunar naging visita kan Sanggunian Panlalawigan kan Camarines Sur sa ginibong session regular kan Enero 16, pighagadan nin mga programa kabali an campania sa ilegal na droga envez an paliwanag na masunod sana sinda sa mga directiva kan saindang oficina central asin ano man na bagong policia.
Sa session kan Martes kan junta provincial dai paman nasumiter kan propuestong resolucion si Oliva envez sagcod sana sa mga pahayag sa media.
Kan Lunes (Enero 22) siya naging visita sa regular na session kan Sanggunian Panlungsod na pighahanapan nin mga programa kan City hall orog na an campania sa ilegal na droga. Envez an simbag kan NBI director na saiyang prioridad iyo an pagtanum nin mga pechay mala ngani igwa pa siyang darang pisog nin okra asin camates.
Na-insulto an Sanggunian kaya ngani sinabihan siya ni bise alcalde Gabriel H. Bordado, Jr. na tatabangan na matawan pa nin mga semilya sa garden gikan sa oficina kan city agriculturist.
Alagad an mga pahayag na iyan ni Saunar saiyang binawi huli ta segun sa saiya “joke only”. Pigconfirmar ni Bordado na binawi kan oficial kan NBI an mga pahayag na prioridad an pagtanum nin mga pechay envez kan pagtao nin atencion sa mga caso nin henious crime.
Kun vivisitahon an atubangan kan oficina regional kan NBI Bicol palibot nin garden kan pechay. Katuyohan kaini na magka-igwa nin food production an oficina mapapakinabangan pa, sabi pa ni Saunar.
Dai man na-ngangahulugan na mayong programa an NBI ngonian na taon huli ta dapat dai ibulgar sa publico an mga pigtatrabajo na makaka-afectar sa saindang investigacion kan mga caso.
May mga policia an oficina central kan NBI na iyo an saiyang iimplementar, sabi pa ni Saunar.
Si Bordado nagsabi na saindang tatawan nin panahon an NBI director huli ta tulong bulan pa sana na nagribay ki Atty. Ricardo Diaz mientras nagbukas man siya na andam na mag-cooperar sa City hall sagcod na ibiklad an mga plano sa executive session.
