GARCHITORENA, Camarines Sur - Sarong grupo nin Taiwanese national kasabuat an dai pa pig-ngaranan na Filipino iyo an nasa likod kan shabu laboratory sa Bicol sa barangay Binagasbasan kan banwaan na ini na sinakyada kan pinagsarong fuersa kan 504th Mobile Group, Regional Mobile Group asin kan intelligence division kan Bicol PNP sa ginibong operacion kan Julio 7, 2007.
Caption: MANGA NAHUKAY NA MGA CHEMICAL SA PAGGIBO NIN SHABU - Retrato sa itaas si P/Chief Inspector Alex Pederio (nakasulot nin kopya) jefe kan 504th Mobile Group kan PNP Camarines Sur asin iba pang oficial kan RMG Bicol nasa atubangan ninda an pigtiripon na mga minasunod na chemicals; anom na bags kan sodium hydroxide, iodine, ephedrine asin red phosporous. Retrato sa ibaba si mga container kan hydrochloric acid. Nahukay kan mga awtoridad sa irarum kan baybayon kan Barangay Binagasbasan, Garchitorena, Cam. Sur.
An shabu laboratory iyo an pigtutubodan nasa likod kan ilegal na droga sa Camarines Sur asin iba pang provincia kan Bicol alagad an PNP sa ginibong pagsakyada mayo nang inabotan na mga suspechado huli ta pig-abandonaran na an lugar mala ngani nahukay na sana sa irarum kan mga baybay an mga selyadong mga manlaen-laen na chemicals na ginagamit sa pag-producir nin shabu.
An district office kan Bureau of Immigration and Deportation (BID) sa Ciudad nin Naga sa pamamayo ni Abogado Jose Tria, pigpahayag na apat sanang mga pangaran nin Taiwanese national an nakaregistro sa saindang oficina kaya posibleng mga ilegal na dayuhan an mga suspechado sa sindicato sa droga.
Si P/Chief Inspector Alex S. Federico jefe kan 504th Mobile Group kan PNP Camarines Sur nagpahayag sa entrevista kan Bicol Mail an informante ninda iyo an nagtaong report kan nasa likod kan operacion kan drug laboratory na nagpoon kan mga bulan nin Septiembre 2006.
Kaibahan sa ginibong pagsakyada iyo si P/Supt. Heriberto O. Olitoquit kan PRMG, an grupo kan intelligence section kan Camarines Sur PNP Provincial Office, alagad mayong polis na hali sa Municipal Police Station kan Garchitorena.
Si chief Inspector Elmer Mora, jefe de policia kan Garchitorena, naglinaw na igwa man nin ginibong coordinacion an raiding team sa saiyang oficina sa paagi nin text messages.
Si Mora, nag-asumir sana sa police station kan Octubre 2006.
An mga nadiscobre asin mga nakasaray na pig-abandonaran na nakatalbong sa baygay iyo an mga minasunod: 1 1/2 na bag kan ephedrine na may timbang nin 35 gramos, 6 na bags kan sodium hydroxide na pig-kakarkulong 150 gramos, 30ng bags kan iodine asin red phosporous asin 16 na containers kan hydrochloric acid na nasa 320ng litros. Ini gabos mga ingrediente sa pag-gibo nin methamphetamine hydrochloride na mas bestado sa shabu.
Kabali pa sa nasamsam iyo an mga gibohan nin paraphernelia sa shabu, compressor, mga botelya, plastic bags asin iba pa.
Sa investigacion sinabi ni Federio an drug laboratory gikan sa Catanduanes nagbalyo sa Garchitorena kan bulan nin Marzo 2006 asin naging operational kan Septiembre 2006.
An testigos kan awtoridad nag-estoria na kan Marzo 2006 an dai mabistong apat na Taiwanese national na may kaibahan na Bicolano an pamidmid sinda mabugtak nin poultry sa barangay asin industria nin houseware product.
Kan nakaaging duwang supertyphoon Melinyo asin Reming nagaba an edificio kan shabu laboratory kaya pigtutubodan pig-taralbong an mga chemical sa droga.
Sa investigacion an lote an may kagsadiri si Ruben Juet na binawian na nin buhay.
Si P/Sr. Supt. Romeo Tambungui, acting Provincial Director kan PNP sa Camarines Sur nagsabi na sainda pang pigpapadagos an investigacion kun panong nakalaog an sinambit na sindicato sa Camarines Sur.
Si alcalde Boy Demetrio, bagong jefe ejecutivo local kan Garchitorena an nabigla man kan sinambit na shabu laboratory mientras na an sindicato sa ilegal na droga nakalaog sa banwaan kan panahon kan nag-talikod na administracion kan LGU.
Enot nang nagluluwas an mga report na igwang shabu laboratory sa sinambit na banwaan, alagad dai man tulos naka-accion an PNP Camarines Sur maging an Police Station.
