Kun an militar an hahapoton an pigtutukdong responsable sa harabonan kan aluminum conductor wire kan National Transmission Corporation iyo an rebeldeng NPA alagad kun sa investigacion sa nadakop na suspechado saindang pigbulgar na kasabuat ninda iyo an PNP.

        An Municipal Police Station kan Buhi, Camarines Sur na-arestar an sarong parahabon na pigbistong si Pedro Rabacal Jr. 27 anyos sa brgy. Lourdes na yaon sa saiyang posession an may 927ng kilong aluminum wire sagcod na saiyang pigtuga an sarong polis na PO2 Gaudencio Murcia kan Iriga Police Station na iyo an nagtataong proteccion sa pag-transportar kan mga hinabunan na propriedad kan Transco. Cantidad P10,000 an suhol sa police cada transportar kaini.

        Nadakop kan Julio 14, 2007 sagcod na pigtuga na saiyang pigpabakal sa junk shop sa brgy. Cararayan, Ciudad nin Naga na sadiri kan pigngaranan na Edwin Dacal.

        An alegacion kan pigsabit ni Rabacal an caso na sinda Murcia asin Dacal anas nagpapahimotik huli ta dai ngani ninda bestado an suspechado asin andam nindang atubangon an ano man na caso.

        Si Rabacal, Murcia asin Dacal, kabali an tolo pang John Does sinangatan na nin caso criminal sa corte kan TransCo sa pagbalga kan Republic Act No. 7832 o an mapadapit sa Anti Pilferage Act.

        Sa Iriga City Police Station, si P/Supt. Tomasito Clet nagsabi na maatubang nin caso administrativo an polis na kasabuat sa harabonan kan aluminum wire dawa na ngani pusog an pahimotik kan acusado.

        Sa ginibong joint coordination meeting kan AFP/PNP/Media sa oficina kan TransCo sa brgy. del Rosario, Ciudad nin Naga an Philippine Army pig-aacusaran na responsable sa harabonan nin aluminum conductor wire sa Buhi pasiring Tiwi, Albay iyo an NPA. Si Lt. Col. Guinay kan 65th Infantry Battalion na may base sa Albay iyo an nagpahayag kaini sa atubangan ni TransCo Vice President Guillermo Redoblando sa presencia kan iba pang oficial kan PA, PNP asin media.

        Alagad mayo man pigsabi kun igwa na sindang nadakop na NPA na parahabon kan propriedad kan TransCo.

        Ngonian igwa nang nadakop an pigtutukdo na kasabuat iyo an PNP. Si Redoblando dai tiwala na awtoridad an kabali sa suspechado asin sa ngonian igwa nang polis an pigtuga kan naarestar na parahabon.

        Sa Tiwi, Albay igwang nang nadakop an PNP na envuelto sa harabonan kan aluminum conductor wire alagad bako man mga miembros kan rebeldeng NPA.

        Si OIC Regional Director Balligi Tira kan Bicol PNP nagsabi na kaipuhan ibali sa investigacion si dating empleados kan TransCo na igwang pakasabot sa pagsakat sa tore na dai ma-cocoriente sa live wire. An TransCo dai man tubod na may envueltong line-man ninda sa harabonan.

        An harabonan kan mga “pansit” kan TransCo iyo ngonian an pigbabasol sa mga nangyayaring brownout.