AN Commission on Election (Comelec) nasurprisa kan mahibog na mga calificadong votantes sa b’gay asin SK election huli ta naglangkaw nin sagcod sa 13 por ciento si nagpalista na kabaliktaran kan piglalaoman na maabot sana 3 asta 5 por ciento apesar anom na bulan palang an nakaka-agi kan huring registracion.
Si Alex Marpuri, oficial na parapahayag kan Comelec Provincial Office sa Camarines Sur nagsabi sa Bicol Mail na bako gabos na mga nagpa-registro an ciertong calificado na mag-voto huli ta nakatalaan na sernihon an lista kan mga pangaran.
Caption: Registracion nin mga votantes padagos na nagdadakul matapos i-extendir pa an pagpalista sa mga oficina kan Comelec kan Julio 24-30, 2007.
An gabos na mga aplicacion maagi sa Election Registration Board (ERB) na iyo an marikisa kun siisay an dapat aprovaran asin digdi pa madidiscobre kun may envueltong mga double registrant.
Naglaba an nagpalista ta posibleng si dating registrado sa ciudad o arin man na banwaan huli ta napapalaban an saindang partidario sa eleccion sa SK asin B’gay nag-decidir na magpuli sa saindang mga barangay nganing digdi mag-voto, sabi pa ni Marpuri.
Sinabi kaini, na an ERB na componido kan Election Officer bilang chairman, Local Civil Registrar vice-chairman asin an Public School District Supervisor iyo man an Secretary matiripon pakatapos kan pinag-extendir na registracion sa mga oficina local kan Comelec.
Dawa na ngani may pag-duda an Comelec sa biglang paglumpat kan mga nagpa-registro, alagad nagpaluwas nin resolucion 8256 asin 8257 na nagpapako kan pagpalawig kan pagpalista kan mga calificadong votantes kan Julio 24 asta Julio 30, 2007 na kuta na nagtapos na kan Julio 22. An sinambit na mga aldaw para sa mga votantes sa barangay election.
Sa Sanggunian Kabataan segun sa oficial na parapahayag kan Comelec cada aldaw nin Sabado asin Domingo sa mga petsa kan Julio 28 asin 29 asin sa Agosto 4 asin 5. Ini pigtalaan nang gibohon sa mga barangay katuwang an designadong paratukdo sa public schools.
Si Comelec Chairman Benjamin Abalos nabigla man kan halangkaw na turn-out kan registracion, sabi pa ni Marpuri.
Susog sa Acta Republica 8218 an mga calificado na magpa-registro sa barangay elections iyo an minasunod:- nag-eedad na nin 18 anyos pataas; nag-eestar na sa Filipinas nin kisiera sarong taon asin sa lugar kun sain na mavoto dapat may anom nang taon.
An mga calificadong magpa-registro sa SK Elections iyo an arin man na Filipinong ciudadano na nag-eedad nin 15 anyos, alagad dai pa natung-tong sa 18 anyos sa panahon kan eleccion sa Octubre 29 na nag-eerok sa barangay na dapat may anom na bulan sa aldaw kan eleccion.
Mientras tanto, si SK Federation Chairman Allen Reondaga kan Ciudad nin Naga nagsabi na maabot sa 15 mil na mga bagong SK members an pigkakarkulo na dapat magpalista ngonian na eleccion.
