AN dating alcalde kan Bombon, Camarines Sur na nagcontrata nin proyecto sa municipio mientras na yaon sa puesto an nasilotan kan Ombudsman na malaom sa carcel poon sa 6 asta 10ng taon huli sa pagbalga kan Anti Graft Law asin provicion kan Local Government Code.
Envuelto sana an cantidad na 75 mil pesos sa duwang contrata na cantidad Php 69,000 asin ika-duwang proyecto Php 6,000 para sa repair and maintenance kan Municipal Hall kan LGU Bombon.
Si Consejal Marcelo O. Real iyo an nagsangat kan caso sa Ombudsman kan taon 1997 na nasa premiro pa sanang termino si Asido asin parejo sindang nasa partido kan Laban ng Democtraticong Pilipino (LDP).
Nagluwas sana an decicion kan nagtalikod na semana asin sa informacion sa text message ni Special Prosecutor Diosdado Calongui ki Real mientras na dai niya pa narerecibe an copia kan resolucion kan Ombudsman. Si Calongui iyo an nagkapot kan sinambit na caso, sabi pa kan consejal.
Sa entrevista kan Bicol Mail ki Real sinabi kaini na envuelto pa an esposa kan dating alcalde na si Mrs. Corazon Zamora Asido huli ta sindang mag-agom iyo an nagcontrata dawa na ngani si Asido incumbent pa kaidto bilang jefe ejecutivo local.
Sadit sana an cantidad sa caso, alagad an ley mayong pinipiling cantidad sa caso sa Anti Graft.
Sa lado kan dating alcalde pigpahayag sa media na nag-aandam na nin motion for reconsideration an saiyang Abogado mientras na pigtawan sinda nin plaso asta sa Julio 15, 2007.
An caso segun sa consejal nabuyagyag na an Bombon Hardware sadiri kan familia Asido na iyo pa an supplier kan mga materiales sa repair and maintenance kan municipio.
Alagad an defensa kan dating alcalde iyan saiya nang naipabakal sa tugang na nagpadalagan kan negocio. Iyan saiyang alegacion na dai man napatubod an jusgado, sabi pa kan Consejal.
Sinabi pa ni Real na an caso an kalaban kan dating alcalde iyo an gobierno huli ta mayo man siyang personal na kaanggotan saiyang piglaban an tama sagcod na naprovaran sa corte.
