AN Sanggunian Panlungsod kan Ciudad nin Naga pigsikwal sana an surat ni Engr. Rodelo Pasumbal OIC-General Manager kan Camarines Sur II Electric Cooperative (Casureco II) na mayong illegal disbursement sa P300,000 an junta directiva sa “Advocacy and Enhancement Project” kan Bicol Electric Cooperative Association, Inc. (BECA) alagad dai niya man pigsimbag an isyu na pigbaranga-banga kan mga miembros kan junta an sinambit na cantidad.

Caption: Sa retrato pigpaheling sa miembros kan media ni Consejal Julian Lavadia Jr. an surat ni OIC-General Manager Engr. Rodelo Pasumbal na nagpapa-himotik na mayong illegal disbursement kan P300,000 na dai man uyon an auditor kan Naga Area Office kan Casureco II.

        An Special Commitee na pig-crear kan sanggunian sa paagi kan resolution No. 2007-170 sa pamamayo ni Consejal Julian C. Lavadia, Jr. nagpadagos kan saindang pagsukit kan katutuanan nganing matabangan an mga miembros consumedores asin publico sa controvercial na isyu sa illegal disbursement na pigbulgar ni Lani Botor, Auditor kan Naga Area Office (NAO) kan Casureco II.

        Sa surat ni Pasumbal sa SP, mayong katutuanan an acusacion sa illegal disbursement huli ta ini base sa resolucion kan junta numerado 2007-84 na nag-appropriar kan P300,000 bilang contribucion kan cooperativa sa BECA.

        Sa enot na miting kan special committee na pig-atendiran kan mga miembros na sinda Johan dela Rosa kan Naga City People’s Council, Abet Bercasio kan Metro Naga Chamber of Commerce and Industry, Butch dela Torre kan consumers group, Consejal Jose Grageda, chairman kan committee on consumers protection kan SP, OIC City Legal Officer Angel Ojastro asin ni Lavadia komo chairman saindang pigkasurondoan na sinda magtatabang sa residence Ombudsman ki Provincial Prosecutor Agapito Rosales sa pagtipon nin mga documentos sa ano man na accion legal kun igwa nin mga evidencia sa isyu sa illegal disbursement.

        Kabali pa sa saindang kinahamanan iyo an pagpadara nin surat ki auditor Lani Botor kan certified true copy kan saiyang audit report; masurat sa BECA kan saindang minutes kan miting sa pagpasar nin resolucion na naghahagad nin ayuda na P300,000; asin masurat sa Casureco II na mag-producir nin mga documentos na mayong illegal disbursement sa pagpaluwas kan fondo kan cooperativa.

        Si Botor nagpahayag sa miembros kan media na saiyang papanindugan an pigbulgar niyang isyu sa illegal disbursement sagcod na mag-arabutan sa corte. Kabali sa report iyo an pagbaranga-banga kan P300,000 kan mga miembros kan junta sa cantidad na tig-a P20,000 afuera ki director Francis Soler na dai pigrecibe, apat na mga department head, si ki Jane Barrameda dai pigrecibe asin kabali si OIC-GM Pasumbal sa mga miembros kan junta na nagrecibe nin cantidad P20,000.

        Nagduda an special committee huli ta apesar na pigsasabing sa APEC party-list alagad sa resolucion kan junta numerado 2007-84 gagamiton para sa image building sa campania kan cooperativa sa propuestong conversion hali sa non-stock pasiring sa stock electric cooperative.

        Cuestionable pa sa sinambit na committee an check no. 0000527765 apesar na an payee iyo an BECA bilang juridical entity, an tsikie dapat ideposito sa bank account kan sinambit na entity alagad pig-encash an tsikie ni Malou Rosin sa cajera kan Casureco II sa sugo ni Pasumbal asin pigtao an cash ki director Benito Manzano, tesurero kan junta, sabi pa sa audit report ni Botor.

        Si Atty. Ojastro nagsabi sa miting kan special committee na an resolucion sa advocacy and enhancement project mayo man nin particular na proyecto kaya ngani ipapadagos ninda an pag-hanap nin katutu-anan sa paglustay nin fondo kan cooperativa.