SIYAM na mga dorogista, kabali an sarong dating barangay kagawad an naarestar kan PNP kan Ciudad nin Naga kaibahan an fuersa kan Public Safety Office kan City Hall asin kan SWAT team kan saindang sakyadahon an shabu tiangge sa Isla Sison, Peņafrancia Avenue kasuodmang alas 11:45ng aga.
Photo Caption: MGA DOROGISTA ARESTADO KAN PNP NAGA, SWAT TEAM ASIN PSO - Pig-atubang ni COP P/Supt. Benjamin Suratos (nakatukaw sa tahaw, kataid si Lito del Rosario kan PSO) sa miembros kan prensa an siyam na mga nagkadarakop sa acto na nag-gagamit nin shabu sa Isla Sison, brgy. Peņafrancia, Ciudad nin Naga. Nasa likod an mga suspechado na sinda; Arnulfo Comprado, dating Brgy. Kgd. kan Tarosanan, Camaligan, Camarines Sur; Jorge de Vera, Alfred Danao, Edwin Aureus, Ariel Agnote, Romeo Comprado, Mario Gomez, Richard Diaz asin si Leda Labuanan (nagtalikod sa camera). Yaon sa atubangan kan lamesa ni Suratos iyo an mga naconfiscar na shabu asin iba pang mga paraphernilla.
An residencia ni Arnulfo Comprado kan Isla Sison, asin nasa lista kan PNP na envuelto sa ilegal na droga iyo an sinakyada kan mga miembros kan awtoridad.
An sinambit na lugar nagkapera nang veces na pigsakyada kan PNP asin PDEA maging kan NBI alagad huli ta shabu tiangge dai ma-ubos-ubos an mga dorogista.
Kan panahon ni NBI Director Ricardo Diaz, sinakyada na an sinambit na lugar asin igwa nang mga sinangatan nin caso sa RA 9165, kaya ngani markado na nin pula kan PNP Naga an Isla Sison.
Pig presentar ni OIC Chief of Police P/Supt. Benjamin Suratos sa prensa an mga suspechado na nadakop sa acto na naggagamit nin ilegal na droga asin kinababalihan ninda: Edwin Aureus y Sales, 37 kan brgy. Dayangdang, Ciudad nin Naga; Alfredo Danao y Recafrente, 28, taga San Roque, Pili, Camarines Sur; Jorge de Vera III y Corporal, 26, Paraiso St., Sta. Cruz, Ciudad nin Naga; Arnel Agnote y Wares, 29 taga Sta. Cruz, Ciudad nin Naga; Romeo Comprado y Buyong, 22 kan Isla Sison, Peņafrancia Avenue; Marica Gomez y Perez, 42, taga Kalalayan St., Diliman, Quezon City asin nag-eerok sa zone 5 kan brgy. San Francisco, Ciudad nin Naga; Arnulfo Comprado y Cadores, 57, kan Tarosanan, Camaligan, Camarines Sur; Richard Diaz y Matabang, 25, kan zona 1, Mabulo, Ciudad nin Naga asin si Leda Labuanan y Paragas, 37, daraga, kan zona 5, San Francisco, Ciudad nin Naga.
Nasamsam sa sainda iyo an 24ng sachet nin shabu, cash nagcacantidad nin P15,347.00, duwang cellphone, mga liter na gamit sa pot session, aluminum foil na pampatos sa shabu, motorsiklo na ginamit sa pag-transportar kan droga asin iba pang mga paraphernilla.
An policia kan Naga dawa panahon nin eleccion alagad dai nagpahayag sa campania sa ilegal na droga mala ngani sobra sa sarong bulan an ginibo nindang pag-monitor sa operacion kan ilegal na droga sa Isla Sison na bestadong shabu tiangge sa Naga, sabi pa ni Suratos.
Sinda envuelto sa pag-gamit asin pagtulak kan droga mientras na kadakli sa saindang arog kan mga Comprado, nagkapera nang veces naarestar asin may pendiente na nin caso sa ilegal na droga.
An caso sa pagbalga sa Acta Republica 9165 iyo an saindang inaatubang na caso sagcod na directa nang sangatan nin caso kan PNP Naga.
An mga apprehending officer iyo sinda SPO1 Ruben Antonio, PO3 Raul Salonga Bongon; PO3 Norberto Ruz Genova asin PO2 Romeo Ranara, mga civilian na hali sa oficina kan PSO sinda Rodito Francisco, Jayvee Banaag asin Hermie Bin.
