AN Philippine Drug Enforcement Agency (PDEA) sa Camarines Sur na may oficina sa atubangan mismo kan natad kan PNP Naga an mayo nang serve sa ngonian huli ta haloy nang sarado na dating kulang an saindang personajes alagad sa ngonian entero nang mayong naglalaog sa oficina.
Photo Caption: OFICINA KAN PDEA PIG-ABANDONARAN NA - Sa retrato sa to-o iyo an oficina kan PDEA sa Ciudad nin Naga na nasa atubangan mismo kan PNP Naga haloy nang sarado dai pa naheling ni OIC Chief of Police P/Supt. Benjamin Suratos na nag-bukas kan oficina. An sinambit na oficina kan PDEA dating nagseserve sa Camarines Sur alagad kulang na marhay an personajes kaya dagos nang tinuwadan.
An PNP Naga na suhay man sa PDEA, sinabi ni OIC Chief of Police P/Supt. Benjamin Suratos na kan siya mag-asumir sa policia kan Ciudad nin Naga kan enot na semana kan Noviembre 2006 dai niya naheling na nagbukas an sinambit na oficina.
Igwang directiva na an miembros kan PNP na yaon sa PDEA dapat mag-firma sa sarong waiver kun sinda mapadagos na miembro kan PDEA o sa PNP asin sagcod na sana sa Junio 2007 an saindang plaso na magdecicion.
An campo crame mapasunod na kan pagbawi kan miembros kan PNP na destino sa PDEA nganing gamiton an fuersa contra sa mga criminalidad asin sa campania sa insurgencia. Kun iimplementar si PNP Chief director General Oscar Calderon an pag-recall 50 por ciento kan mga miembros kan PDEA an mawawara o 1,000 personajes na destino sa manlaen-laen na rehiyon kabali an Manila.
Si P/Chief Inspector Nelson del Socorro dating jefe kan PDEA sa Camarines na componido sana sinda nin tulong miembros an dai naman naglalaog mientras na yaon na sa Ciudad nin Legazpi asin dai man nagwalat nin coordinacion sa PNP Naga kun siisay an nagribay sa saiya.
An Ciudad nin Naga na may halangkaw nin caso sa ilegal na droga alagad an PDEA na iyo an may mayor na obligacion an campania contra sa droga an dagos nang pinabayaan.
Pigpaliwanag man ni Suratos na sa PNP Naga iyo an naghihiro sa campania contra sa sinambit na ilegal na actividad mientras na sinda deputized man sa campania sa droga.
An PDEA piglalaoman na makulang an saindang personajes efecto sa Julio 2007 oras na bawion na kan PNP an mga police detail sa agenciang ini.
Dawa mayo na kan mga elementos kan PDEA sa Ciudad nin Naga alagad kan Marzo 7ng udto an PNP Naga, SWAT team asin an Public Safety Office (PSO) kan City Hall nagconducir nin pananakyada sa shabu tiangge sa Isla Sison, Peņafrancia Ave., na siyam an mga nagkadarakop acto na nag-gagamit kan shabu.
An sinambit na lugar bantugan na tataghan kan ilegal na droga sa laog kan ciudad na sagcod sa ngonian dai ma-ubos-ubos an mga nagkakadarakop particularmente an nagkaduwa sagcod sa tulong familia an bestado na drug pusher asin nag-gagamit kan ilegal na droga.
Si alcalde Jesse M. Robredo nagsabi na an sinambit na operacion enot pinaabot sa saiyang oficina sagcod na nag-gibo nin operacion nganing magkadarakop an mga envuelto sa droga. Sinda tulos man pigpa-abotan nin comendacion kan alcalde.
