MAATUBANG nin caso administrativo an mga oficiales de barangay asin mga tanod kun magpalyar sa pag-implementar kan Memorandum Circular No. 2007-05 na pig-isyu ni DILG Secretary Ronaldo V. Puno kan Marzo 12, ngonian na taon.

Photo Caption: OPERACION BAKLAS - Si PO1 Santos P. Miraña, pNp Canaman, pigsugo an poster boys na baklason an mga illegal campaign materials na binugtak ninda sa luwas kan common poster area.

        An sinambit na Memo Circular iyo an Comelec en banc Resolution No. 7823 na pig-promulgar kan Febrero 14, 1007, na pig-deputized an oficiales de barangay asin barangay tanods sa gabos na ciudades asin municipalidades, sa pagbaklas kan mga illegal campaign materials.

        Si City Director Fatima M. Penino kan DILG sa Ciudad nin Naga nagconfirmar sa Bicol Mail na nakarecibe na sinda kan copia kan memorandum circular asin sa miting kan mga barangay secretary kasuodmang hapon pigparecibe na kan saiyang oficina an memorandum nganing estrictong iimplementar kan mga oficiales de barangay.

        An Liga ng mga Barangay sa Ciudad nin Naga sa pamamayo ni Liga President Jose Maria Mercado mayo pa nin panindugan kun saindang iimplementar huli ta an City Legal Officer kan City Hall an dai uyon sa resolucion kan Comelec.

        Sa entrevista ki Abogado Nelson Legacion, City Legal Officer kan ciudad sinabi kaini sa Bicol Mail na mabalga sa Seccion 264 kan Omnibus Election Code an pag-deputized sa mga oficiales de barangay asin tanods huli ta pigtawan sinda nin poder na arestaron an mga nag-cacampania sa paagi kan pagbugtak nin mga campaign materials kan candidato.

        Kabali sa mga trabajo ninda sa barangay sa gigibohon na eleccion, iyo an mga minasunod:

        1. Baklason an mga campaign propaganda materials na binugtak sa mga pampublikong lugar na luwas sa common poster area;

        2. Baklason an mga illegal campaign materials na dawa sain na sana pig-displayed;

        3. Mag-gibo nin mga accomplishment report sa saindang campania contra sa mga ilegal na posters; asin

        4. Dapat mag-monitor asin bantayan an mga persona na nagbubugtak asin nag-didistribuir kan sinambit na unlawful election paraphernalia asin arestaron an siisay man madadakop nin “in flagrante delicto”.

        Alagad an Provincial Office kan Comelec sa Camarines Sur nganing dai mapasala kan implementacion kan Comelec resolution saindang pig-papaatendir sa mga seminar an mga oficiales na envuelto digdi. Si Alex Marpuri, oficial na parapahayag kan Comelec sa provincia nagsabi na envez kan pag-arestar susog sa resolucion koanon na sana an mga evidencia, pangaran kan persona na nadakop sa acto asin sangatan nin caso huli ta ini sarong election offense.

        Madakul an mga mapadurokot nin mga campaign materials pakatapos sana kan pag-plantiar nin certifico de candidatura kan mga candidato local sa Marzo 29.

        Ini ngonian an pig-aabangan kan Comelec asin DILG kaya ngani pig-deputized na an mga oficiales de barangay huli ta cada eleccion dai na nasusunod an “Fair Election Act” kan mga candidato local asin nacional.