MAGLIKAY sa mga samput ta an ugali maraut:

        Arug kan samput na ikos, maikit asin maunas nin pritos; arug man kan samput na ayam, kun makakagat tibaad makagadan ta igwa nin rabies na helang; siring man an samput na salampati, naglalalay nin kapwa gamgam padulag sa may ataman.

        Si Datu, an presidential dynasty, samput na kandidato sa pagka-diputado sa primer distrito. Nagkakan sana nin loglog, kinalas asin sinapot ginibo na ni LRay asin pagiriba sa Sanggunian adopted son kan probinsya.

        Samput asin kinarburuhan na Bikolano ta sarong Pampagueño. Nagsamput sa Calabanga tanganing mag-eskwela sa Siyudad nin Naga.

        Samput sa Ateneo de Naga ta dai pinalaog sa Ateneo de Manila kan maaraman na kan maging grade four yaon sa row four: maski hinahapot dai naggigirong asin dai tataong mag-spell nin “because”!

        Kan inot na aldaw nag-isip na ma-kandidatong alkalde sa Maogmang Lugar, kaya hali sa Calabanga nagsamput sa Naga. Alagad natakot ki Jesse Robredo ta siguradong pupuruton siya sa kangkungan. Dai ipinadagos an plano.

        Nakadangog na sa primer distrito igwang ipinapabakal na pwestong diputado na dadalaganan kuta kan agom kan nakatukaw na kongresista.

        Kan mabakal na ni Datu an pwestong diputado ki Marissa, tulos-tulos naglipat nin harong pasiring sa Libmanan ta mas dakul an tawo duman. Nagsamput sa Brgy. Potot kun sain nagtugdok nin palasyo sa daga na ipinabakal saiya ni Andaya.

        Binarakal an mga Alkalde sa primer distrito: Minalabac, Cabusao, Pasacao, Pamplona, Libmanan, Lupi, Sipocot, Ragay, Del Gallego, apwera kan San Fernando.

        Samput na an kandidato, samput pa an campaign manager: Si Ower Handal, sarong Batangueño. An spokesman, samput man: si Abogado Carandang, tubo nin Batangas.

        Ano man baya ta magtios an mga taga primer distrito nin diputado na samput asin kinarborohan na Bikolano. Miyembro nin pamilya na political dynasty, trapo; an ina putikon, suspetsadong nagdaya ki Fernando Poe Jr., presidente kan gobyerno na “Most Corrupt in Asia”?

        Igwa man lang kandidato na malinig an ngaran asin marhay an dangog: si Sabas Mabulo!

        Si Mabulo antigong Bikolano, tubong San Fernando kan primer distrito, probado na sa serbisyo, siyam na taon na mayor kan San Fernando, mahigos, bakong kurapto. An kabatiran nakakapareho kan pagka-aram ni Mayor Jesse Robredo.

        Kun baga sa pambolang na manok: pang-derby, manok na talon, pusog asin maisog sa purok, gadan na dai pa nadulag!

        Iyan lang diit sana an campaign funds pero kwartang ginanutan. An kalaban na si Datu dakul an kwarta. Wala-too kun magbahug nin logistics.

        Kaya kun tatawan nin kwarta, kuaha! Alagad an kwarta sa bulsa, an boto ki Sabas Mabulo!