Sinasabi na kan enot na madiskubre kan tawo an kalayo, sinamba niya ini. An kalayo bilang simbolo nag-ako nin duwang pandok, ini sa sarong katood asin sa kaiwal. Enot sa gabos, dai kaya kan tawo an lipot kan banggi, an diklom kan kinaban, kun kaya nin huli sa kalayo itinulod na magkaigwa nin igwang porma kan enerhiya asin kusog tanganing an lipot mabawasan asin an diklom mapara. Alagad, kaiwal man an kalayo, dai ini dapat kawatan. Kun niluluto kaini an satuyang mga panira, pwede man kaining tutungon an satuyang mga pangiturogan. Sabi ngani kaiyan, mas marhay nang mahabonan kisa masuloan. Katakod pa kan paniniwalang ini na malas an magpadagos sa mga nasuloan nin harong. Bako lang yan, minsan sa simbolo kan simbahan, an kalayo pwede man na gamiton sa pagladawan sa impyerno asin man kan Espirito Santo na naghilig sa mga disipulos asin an kalayong ini na garo dila an nahiling sa saindang payo.

        An bulan nin Marso, itinalaan na Fire Prevention Month, ini nin huli tanganing mabawasan o maibitaran an kasulo na saro talagang dakulang trahedya nin huli siring sa sinabi ni John Keekes, sarong kontemporanyong pilosopo sa Amerika, na an ‘nature’ dai man talagang nagsusunod nin moral choice. Mayo man pinipili an mga kalamidad na ini kun saen sinda maabot o saen matama. Arog man kaiyan an kasulo. Mayong isip an kalayo alagad pwedeng si mga may-isip an maggamit kaini tanganing an sarong lugar gibohon na kabaing baga kan impyerno arog kan COMELEC na nasulo kaining huring aldaw. An trahedyang ini bako sanang kawaran o pagkaraot nin sarong edipisyo kundi sarong institusyon na kuta iyo an pinaka-imahen nin tunay na demokrasya. Alagad sa nasyon na dai na nasusuhay kun ano an reyalidad sa pangiturogan, bako nang makangalas an kasulong ini sa COMELEC. Kun aksidente ini pwede kuta ining maibitaran, alagad kun tuyo, siisay satuya an makusog boot na itukdo an mga demonyong naghilig kan aldaw na idto. Sa panahon na nanyari ini na madali na an eleksyon, ano an pwede tang isipon minsan makatakot an magtumang sa gobyernong ini na aro-aldaw lalong nagiging ladawan nin kalayo asin asupre? Pwede kitang magngirit kan pangyayaring ini nin huli ta saen pa man kita maduman kun an nasyon na ini nasusulo na kan mga pulitikong dai man ibang inisip kundi an saindang mga sadiri. Anong kalayo an kaipuhan ta tanganing mabangrawan an liwanag sa madiklom tang kamugtakan?

        Sa Mayong ini, giraray kitang tinatawan nin okasyon, eleksyon na sa ngonyan pa sana garo na sarong karnabal ang nangyayari. Mahihiling ta na garo bulang an satuyang eleksyon. Ngonyan pa sana nagluwasan na an mga t.v. ads nin mga pulitiko, kanya-kanyang gimik, kanya-kanyang pasali, kanya-kanyang okasyon. Haloy na kitang yaon sa kamugtakan na ini asin sa harayong paghiling, mamawot sana kita asin mahapot kun nuarin asin sagkod saen kita maako asin makakan nin tinapay na igwang ipit na kwarta tanganing bakalon an satuyang mga boto? Mayo naman gayod mangyayari sa Mayo. Asin arin pa daw an masusunod na masusulo?

        Kun may riparo o mensahe ipadara sa boronyog@yahoo.com.