AN National Transmission Corporation (Transco) nagcierto na ibabalik na an normal na bulos kan corriente sa Bicol sa Mayo 12 duwang aldaw antes kan eleccion sa Mayo 14, alagad dai pa matatapos an rehabilitacion kan anom na nagbaragsak na tore afuera kan natatada pang nadestroso kan bagyong Milenyo asin Reming.
Caption: Pagbagsak kan Naga-Tayabas 500 kV Line - Sa retrato pigpaheling ni Transco Vice President Guillermo Redoblando sa miembros kan media an bitbit kan duwang lineman na “Y-clevis” kan tore na biglang naputol kan Mayo 1, 2007 na causa kan mga nangyaring brownout sa apat na cooperativa nin corriente sa Cam. Sur asin iba pang provincia kan Bicol.
Si Presidente Gloria Macapagal-Arroyo igwa nang directiva sa Transco na parikason na an rehabilitacion kan mga linea kan corriente huli ta nagrarani na an eleccion.
Si Arthur Aguilar, Presidente asin Chief Executive Officer kan Transco asin iba pang oficiales kaini nag-atubang sa miembros kan prensa sa Ciudad nin Naga kan Lunes na banggi asin saindang pigpaliwanag an causa kan nangyayaring rotating brownout.
Maabot sa 42 na mga tore kan Bagyong Milenyo asin 118ng tore an pinabagsak kan Bagyong Reming kaya an peligro sa problema sa brownout dawa pakatapos kan eleccion dai pa mahahali sagcod na pueding aboton naman nin panibagong bagyo ngonian na taon mientras na dai pa matapos-tapos an rehabilitacion huli ta dificil pa an transportacion pasakat sa bukid.
Enot na naging causa kan mga brownout iyo an incidente kan Mayo 1, 2007 kan magka-igwa nin problema an Tower #286 na iyo “Y-Clevis” na naputol sagcod kan Mayo 2 asin nagsunod an anom pang mga tore an nagkaturomba.
An Tower #286 iyo an Naga-Tayabas 500KV Line na nagsusupply nin corriente sa Camarines Sur asin ngonian palyado pa kaya ngani pig-iimplementar an rotating brownout na kun haen duwang oras an pagpalsok kan bulos nin corriente na tulong veces cada aldaw na dai pigsasarabay an mga cooperativa nin corriente sa Bicol.
Binasol kan presidente/CEO kan Transco an mga parahabon nin batbat kan tore na iyo an dahilan kan surunodan na pag-bagsak kan anom na tore dawa mayo nin supertyphoon. Maabot na sa P2 billiones an destroso huli kan calamidad asin causa pa kan mga parahabon nin batbat.
Nakadugang pa sa pagkulang kulang nin supply nin corriente huli ta naglangkaw pa an consumo nin corriente ngonian nin tag-init na nag-aabot na sa 150 megawatts.
Nagkokoa nin dugang na supply nin corriente sa Bacman Manito asin sa Tiwi Geothermal Plant.
Ngonian na aldaw si dating tulong veces na brown out cada aldaw sa laog nin duwang oras mahuros na sana sa duwa sagcod na maging normal an dalagan kan corriente sa Mayo 12, 2007.
Sa sinambit na press conference nag-asegurar an Transco na regular mapadara kan anuncio kan mga brownout sa mga estaciones nin radyo asin television.
Mientras tanto, nag-apelar an Transco sa mga residentes kan mga barangay na magtabang na mareparo asin mabantayan an mga tore sa saindang lugar na pighaharabon an mga batbat na iyo an causa kan mga pagkatumba kan tore asin iyo an dahilan kan mga pagkawara kan servicio nin corriente.
